Linkin Park áni qazaqy naqyshta: Ulttyq ulan hory reseılik shoýdy shýlatty
ASTANA. KAZINFORM — QR Ulttyq ulanynyń Án-bı ansambli Máskeýde ótken áıgili «Ný-ka, vse vmeste! Horom!» vokaldyq shoýyna qatysyp, qazylar alqasy men kórermendi erekshe tájirıbesimen tańdaı qaqtyrdy.
Olar álemge áıgili Linkin Park tobynyń «Numb» hıt ánin dombyra men zamanaýı roktyń úılesiminde oryndap, áleýmettik jelini shýlatty. Osy erekshe joba men ujymnyń jetistikteri týraly «Jibek Joly» telearnasynyń «Búgin.LIVE» baǵdarlamasynda ansambl ókilderi aıtyp berdi.
Bul halyqaralyq jobaǵa qatysý — ujymnyń kópten kútken armany. Shoýdyń jeti jyldyq tarıhynda bıyl hor janrynyń qosylýy qazaqstandyq áskerılerge jol ashqan. Uıymdastyrýshylardyń ózi Ulttyq ulan ujymyna ınternettegi kaver-beıneleri arqyly habarlasqan eken.
— Shoý uıymdastyrýshylaryna erekshe áser kerek boldy. Kórermender áskerı kıimdegi ujymnan qazaqsha nemese áskerı án kútkeni anyq. Biraq biz sahnaǵa aǵylshyn tilindegi rok ánmen atyp shyqtyq. 100 adamnan turatyn qazylar alqasyn tańǵaldyrý basty maqsatymyz edi. Rokty hormen oryndaýdyń ózindik áseri boldy, — deıdi QR Ulttyq ulan erler horynyń kórkemdik jetekshisi Baýyrjan Altynbekov.
Hormeıster Ádil Shagırovtyń aıtýynsha, baǵdarlamanyń sátti shyǵýyna kásibı oryndaý men ulttyq aspaptyń úni septigin tıgizgen.
— Bizdiń bul shyǵarmany tańdaǵanymyzǵa ǵana emes, ony qazaqı dombyramen óńdep, folklorlyq elementter qosqanymyzǵa sarapshylar qatty tańǵaldy. Rok stılin hormen oryndaý — tehnıkalyq jaǵynan óte kúrdeli protsess. Alaıda kásibı oryndaýymyzdyń jáne erekshe formattyń arqasynda halyqtyń kózaıymyna aınaldyq, — dep atap ótti hormeıster.
Básekelestik óte joǵary bolǵandyqtan, ujym fınalǵa ótpegenimen, Máskeý tórinde qazaq rýhyn pash etip, halyqtyń ystyq yqylasyna bólendi. Endigi kezekte ujymdy úlken mereıtoı kútip tur.
— Bıyl bizdiń hor ujymyna 10 jyl tolady. Osy mereıtoıǵa baılanysty Qazaqstanda buryn-sońdy bolmaǵan aýqymdy eseptik kontsert bergeli jatyrmyz. Aldymen Astanada ótedi, keıin búkil el boıynsha gastroldik saparǵa shyǵamyz. Qazirdiń ózinde TMD elderinen shaqyrtýlar túsip jatyr, — deıdi Baýyrjan Altynbekov.
Aıta keteıik, buǵan deıin Ulttyq ulan áskerı qyzmetkeri halyqaralyq dron-jarysynda júldege ıe bolǵan edi.
