Lıngvıstıkadan respýblıkalyq olımpıada: óńirlerde myńǵa jýyq oqýshy synǵa tústi
ASTANA. KAZINFORM — Lıngvıstıka páninen respýblıkalyq olımpıadanyń oblystyq kezeńine 1 000-ǵa jýyq oqýshy qatysyp jatyr, dep habarlaıdy Oqý-aǵartý mınıstrliginiń baspasóz qyzmeti.
Qazaqstannyń barlyq óńirinde 8–11(12)-synyp oqýshylary arasynda lıngvıstıka páninen respýblıkalyq olımpıadanyń ekinshi (oblystyq) kezeńi ótip jatyr.
Zııatkerlik saıysqa aýdandyq jáne qalalyq kezeńderden sátti ótken 1 000-ǵa jýyq oqýshy qatysyp otyr.
Olımpıadanyń birinshi kezeńinde 9 myń oqýshy óz bilimin synaǵan bolatyn.
Olımpıada oqýshylardyń logıkalyq jáne analıtıkalyq oılaý qabiletterin damytýǵa, tildik zańdylyqtardy anyqtaý jáne standarttan tys sheshimder qabyldaý daǵdylaryn qalyptastyrýǵa baǵyttalǵan.
Qatysýshylar tildik qurylymdardy taldaý, tildik qubylystardy salystyrý jáne logıkalyq paıymdaý negizinde qorytyndy jasaý boıynsha tapsyrmalar oryndaıdy.
Oblystyq kezeńniń qorytyndysy boıynsha respýblıkalyq kezeńde óz óńirleriniń namysyn qorǵaıtyn úzdik qatysýshylar anyqtalady.
Respýblıkalyq kezeń 2026 jylǵy 30 qarashada ótedi.
Oǵan ár óńir men uıymnan oblystyq kezeńde eń joǵary upaı jınaǵan úsh oqýshydan quralǵan komanda qatysady.
Osyǵan deıin qarjylyq saýattylyq boıynsha respýblıkalyq olımpıada bastalatynyn jazdyq.
