«Lımýzınmen» zeınetkerdi qaǵyp óltirgen qostanaılyq bostandyqqa shyqty
QOSTANAI. QazAqparat - Qostanaı oblystyq soty zeınetkerdi qaqqan «Lımýzın» kóliginiń júrgizýshisine qatysty apellıatsııalyq shaǵymdy qarady, dep habarlaıdy QazAqparat tilshisi.
Oblystyq ІІD baspasóz qyzmetindegiler Qostanaı qalalyq sotynda oqylǵan úkim alynyp tastalǵanyn aıtty. Eske salsaq, 37 jastaǵy Mıhaıl Glýhenkııge 3 jyl 9 aı bas bostandyǵynan aıyrý jazasy taǵaıyndalǵan bolatyn.
Apellıatsııalyq shaǵymnan keıin onyń jazasy qaıta qaraldy.
«Qostanaı oblystyq sotynyń sheshimimen Mıhaıl Glýhenkııdiń jazasyn óteý merzimi shartty túrde 2 jyl 6 aıǵa ózgertildi. Osy ýaqyt aralyǵynda oǵan tek probatsııalyq baqylaý ornatylady. Sebebi, ol jábirlenýshi tarapqa 1 mln 321 myń teńge materıaldyq, 2 mln teńge moraldyq shyǵyn ótedi jáne sábıiniń bolýy eskerildi. Sondaı-aq Glýhenkıı 3 jyl kólik basqarý quqyǵynan aıyryldy», - dep málim etti oblystyq sottan.
Aıta keteıik, qaıǵyly oqıǵa 2017 jyldyń 17 shildesi kúni bolǵan. Karbyshev kóshesindegi avtoturaqtardyń birinde 37 jastaǵy «Lımýzın» júrgizýshisi Mıhaıl Glýhenkıı 74 jastaǵy zeınetkerdi qaǵyp ketken. Ol avtoturaqta kúzetshi bolyp jumys istegen.
