Lılııa Rah: Men ádil sotqa sendim
ALMATY. QazAqparat - Qylmystyq jaýapkershilikten bosatylǵan Lılııa Rah sóz aldy, dep habarlaıdy QazAqparat tilshisi sot zalynan.
«Men ádil sotqa, ádildikke, dostaryma árqashan da sendim. Osylaı is aıaqtalyp otyrǵanyna baılanysty men qazir Qudaıǵa shúkir, dostaryma alǵys aıtamyn», - dedi L.Rah.
Eske sala keteıik, búgin Apellıatsııalyq sot alqasy Almaly aýdandyq soty shyǵarǵan basty sot úkimin ózgertip, Lılııa Rahty qylmystyq jaýapkershilikten bosatty.
«Almaty qalasy Almaly aýdandyq sotynyń 2016 jyldyń 10 qarashasynda shyǵarǵan Lılııa Rah, Mırı Paz, Bahyt Shalbaev, Islam Mısırovqa qatysty úkimi ózgertilsin. Lılııa Rahqa qatysty sot úkimi QR QK-niń 2-baby 68-bóligi boıynsha taraptardyń medıatsııa tártibi arqyly tatýlasýyna baılanysty ózgertilip, dereý bosatylsyn», - dedi sýdıa Qaramanov.
Aıta keteıik, Bahyt Shalbaev pen Islam Mısırovqa qatysty jaza taǵaıyndaý boıynsha sot úkimi ózgerissiz qaldyryldy. Sot Mırı Pazǵa qatysty jábirlenýshiniń jaza taǵaıyndaýdy kúsheıtý boıynsha talabyn qanaǵattandyrmaı, basty sot úkimin ózgerissiz qaldyrdy.
Sonymen qatar, sot sottalýshylardyń múlkin tárkileýge qatysty sot úkimin toqtatty. Apellıatsııa alqasy Mırı Pazdyń jábirlenýshi Sývanovtyń ózin qylmystyq jazaǵa tartý jónindegi ótinimin qanaǵattandyrýǵa negiz joq ekenin aıtty.
Eske sala keteıik, Paz Sývanovty jalǵan kýálik berdi dep aıyptaǵan bolatyn.
