Lıhtenshteınde taq muragerliginde erler men áıelderdiń quqyǵy teńestirildi
ASTANA.KAZINFORM — Lıhtenshteınniń knıazdik áýleti taq muragerligi tártibin ózgertip, erler men áıelderdiń quqyǵyn teńestirdi. Bul týraly 15 tamyzda knıazdiktiń Ulttyq kúnine arnalǵan úndeýinde taq murageri Aloız málimdedi, dep habarlaıdy Kazinform agenttiginiń Brıýsseldegi menshikti tilshisi.
Qabyldanǵan ózgeristerge sáıkes, budan bylaı bılik júrgizip otyrǵan knıaz nemese knıagınıanyń tuńǵysh balasy jynysyna qaramastan taq murageri bolady.
— Taq muragerligi erlerge basymdyq beretin júıeden absolıýtti tuńǵyshtyq qaǵıdatyna aýysty. Bul degenimiz — budan bylaı tuńǵysh bala jynysyna qaramastan taq murageri, keıin Lıhtenshteın knıazi nemese knıagınıasy bolady, — dedi taq murageri Aloız.
Bul sheshim sársenbi kúni knıazdik áýlettiń daýys berý quqyǵy bar músheleriniń úshten ekisiniń qoldaýymen maquldandy. Ózgerister tek taq murageri Aloız ben onyń jubaıy, taq murageri Sofınyń bolashaq urpaqtaryna qatysty. Áýlettiń qazirgi múshelerine jańa erejeler qoldanylmaıdy.
Sonymen qatar knıazdik áýlettiń áıel urpaqtaryna otbasy zańyna qatysty máselelerdi sheshýge erlermen teń dárejede qatysý quqyǵy berildi.
— Osy zańnamalyq ózgeris arqyly Lıhtenshteın knıazdigin de, knıazdik áýletti de bul jaýapkershilikke barynsha daıyn tulǵa basqarýyn qamtamasyz etkimiz keledi, — dep atap ótti Aloız.
Knıaz Hans-Adam II memleket basshysy bolyp qala beredi. Alaıda 2004 jyldan beri negizgi ókilettikterdi onyń úlken uly — taq murageri Aloız júzege asyryp keledi.
Lıhtenshteın Eýropada erlerge ǵana basymdyq beretin taq muragerligi tártibi saqtalǵan sońǵy monarhııalardyń biri edi. Endi knıazdik tuńǵysh balanyń jynysyna qaramaı taqqa murager bolýyna múmkindik beretin absolıýtti tuńǵyshtyq qaǵıdatyna kóshken Eýropanyń kóptegen koroldik áýletterine qosyldy.
Aıta keteıik, 15 tamyz kúni Memleket basshysy Lıhtenshteınniń Taq muragerin Knıazdiktiń Ulttyq kúnimen quttyqtady.
