Lıhtenshteınde hakerler kompanııa ıeleriniń derekterin urlaǵan
ASTANA. KAZINFORM – Lıhtenshteın bıligi memlekettik tizilimge jasalǵan aýqymdy kıbershabýyl saldarynan kompanııalar, qorlar men trast ıeleriniń derekteri qoldy bolǵanyn málimdedi, dep habarlaıdy BILD basylymy.
Oqıǵa shamamen 31 myń zańdy tulǵaǵa áser etti. Mamandar alaıaqtyq pen bopsalaý qaýpi artqanyn eskertip otyr.
Lıhtenshteın – Shveıtsarııa men Aýstrııa arasynda ornalasqan, halqy shamamen 41 myń adam bolatyn knıazdik. El Eýropadaǵy iri qarjy ortalyqtarynyń biri sanalady. Munda myńdaǵan halyqaralyq kompanııa, qor jáne trast tirkelgen.
Kıberqylmyskerler kompanııalar, qorlar men trastardyń naqty benefıtsıar ıeleri týraly málimetter saqtalǵan qupııa tizilimge (VwbP) qol jetkizgen.
Úkimet basshysy Brıgıtte Haas bılik bolǵan oqıǵaǵa ókinish bildirip, shabýyldyń mán-jaıyn anyqtaý jáne aqparattyq júıelerdiń qaýipsizdigin qalpyna keltirý sharalary júrgizilip jatqanyn aıtty.
Zardap shekkenderdiń qatarynda Lıhtenshteın azamattarymen qatar Shveıtsarııa, Germanııa, Aýstrııa jáne ózge de elderdiń azamattary bolýy múmkin. Tizilimde olardyń aty-jóni, týǵan kúni, azamattyǵy, turǵylyqty eli jáne kompanııadaǵy nemese qordaǵy róli týraly málimetter saqtalǵan.
Kıberqaýipsizdik mamandary mundaı aqparattyń qylmyskerler úshin asa qundy ekenin aıtady. Qoldy bolǵan jeke derekter alaıaqtyqqa, bopsalaýǵa nemese aqsha talap etýge paıdalanylýy múmkin.
Ázirge shabýyldy uıymdastyrǵandardyń kim ekeni anyqtalǵan joq. Sondaı-aq tólem talaptary túspegen jáne urlanǵan aqparattyń darknette jarııalanǵany týraly belgiler baıqalmaǵan.
Mamandardyń pikirinshe, bul oqıǵa Lıhtenshteınniń halyqaralyq bedeline eleýli nuqsan keltirdi.
Eske sala ketsek, buǵan deıin Japonııada 46 myń akkaýntty óshirgen 15 jastaǵy jasóspirim kúdikti retinde qamaýǵa alynǵanyn jazdyq.
