Lıga kýbogy: «Astana» qaraǵandylyq «Shahterdi» iri eseppen jeńdi

ASTANA. KAZINFORM – Qaraǵandylyq «Shahter» komandasyna qarsy ótkizgen syrt alańdaǵy oıynda Babaıan fýtbolshylary 2:4 esebimen jeńiske jetti.

Alǵashqy taımda eki komanda bir-biriniń qaqpasyna qos doptan saldy. Kezdesýdegi birinshi goldy 6-mınýtta kenshiler sapyna jýyrda ǵana aýysyp kelgen Evgenıı Kozlov soqty. Kóp kúttirmeı oıynnyń 14-mınýtynda astanalyq klýbtyń jańa oıynshysy Djeffrı qarymta qaıtardy. Al, 28 mınýtta penaltıden gol soǵyp, dýbl jasady. Biraq «Shahter» komandasynyń tájirıbeli fýtbolshysy Kanıas matchtyń 36-mınýtynda aıyp soqqysyn sátti oryndap, tarazy basyn teńestirdi. 

Oıynnyń ekinshi bóliginde elordalyq klýb basymdyqty arttyryp, «Shahter» qaqpasyna taǵy da eki dop engizdi. Onyń birin 48-mınýtta Grıpshı salsa, oıynnyń núktesin 79-mınýtta Chınedý Djeffrı qoıyp, het trık avtory atandy. 

Aıta keteıik, buǵan deıin «Astana» Lıga kýbogynda aqtaýlyq «Kaspıdi» 5:0 esebimen oısyrata jeńgen bolatyn.