Lıftiniń qulaýy kezinde zardap shekken 2 jumysshynyń jaǵdaıy qalaı

ASTANA. KAZINFORM — Astana qalasynyń Qoǵamdyq densaýlyq saqtaý basqarmasy naýqastardyń biriniń jaǵdaıy ortasha aýyr, al ekinshisiniki aýyr dep baǵalanyp otyrǵanyn málim etti.

Tólebaev kóshesinde ornalasqan úıdiń lıftin jóndeý kezinde qaıǵyly jaǵdaı saldarynan lıft kompanııasynyń bir qyzmetkeri oqıǵa ornynda kóz jumdy. Taǵy eki qyzmetker № 1 kópbeıindi qalalyq aýrýhanaǵa jetkizildi.

— Naýqastardyń biriniń jaǵdaıy ortasha aýyr, al ekinshisiniki aýyr dep baǵalanyp otyr. Bir naýqas anestezıologııa, reanımatsııa jáne ıntensıvti terapııa bólimshesinde, al ekinshisi polıtravma bóliminde jatyr. Olarǵa qajetti barlyq medıtsınalyq kómek kórsetilip jatyr, — delingen habarlamada.

Eske salsaq, elordada tamyz aıynda ishinde bala bolǵan lıft úzilip ketti. Tótenshe jaǵdaı elordanyń M. Tólebaev kóshesindegi kópqabatty turǵyn úıde tirkelgeni belgili.

Osyǵan deıin habarlanǵandaı, qazir eldiń turǵyn úı qorynda 33 858 lıft jabdyǵy bar. Onyń ishinde 4 144 lıft 25 jyldan astam paıdalanylyp keledi, al 3 195 lıft tehnıkalyq qyzmet kórsetý aıasynda kúrdeli jóndeý júrgizýdi talap etedi.