Lıftte shabýyl jasalǵan balaǵa psıhologııalyq kómek kórsetilip jatyr – dáriger

ASTANA. KAZINFORM – Balanyń ómirine esh qaýip tónip turǵan joq, onymen psıholog jumys isteýdi bastady, dep habarlaıdy Kazinform agenttiginiń tilshisi.

Elordalyq №2 kópsalaly balalar aýrýhanasy dırektorynyń orynbasary Medet Nuǵmanovtyń aıtýynsha, keshe tústen keıin aýrýhananyń jaraqat pýnktine 5 jasar bala jedel járdem brıgadasymen jetkizilgen. Ony kezekshi travmatolog pen jaq-bet hırýrgi qaraǵan.

— Balanyń betinde, qulaq mańy men samaıynda 4 jaraqat boldy, sýyq qarý moıynyna jetpegen. Oqıǵa ornynda alǵashqy kómek óte sapaly júrgizilgen, áıtpese bala kóp qan joǵaltyp, asqynýlar bolýy múmkin edi. Bizdiń dárigerler jaraqattardan aqqan qandy toqtatty, tamyrlardy tikti, jalpy operatsııa 1 saǵatqa sozyldy. Bala narkozben uıyqtady, bir saǵattaı jansaqtaý bóliminde jatty, oıanǵan soń bólimshege aýystyryldy. Qazir de patsıent tolyqqandy em alyp jatyr, jaraqat 5-10 kúnde jazylady, bári balanyń aǵzasyna baılanysty, — M. Nuǵmanov tilshilerge bergen suhbatynda.

Sondaı-aq, aýrýhana psıhologtary zardap shekken balamen jumys isteýdi bastady.

— Árıne, jaraqattan keıin tyrtyq qalady, ony ýaqyt kórsetedi, óse kele tyrtyq baıqalmaýy da múmkin. Qazir balanyń jaǵdaıy turaqty, esh asqyný joq, ómirine esh qaýip turǵan joq, — dep túıindedi dáriger.

Aıta keteıik, keshe elordadaǵy turǵyn úılerdiń biriniń lıftinde belgisiz jasóspirimniń kishkentaı balaǵa pyshaqpen shabýyl jasaǵany týraly aqparat tarady.

Shabýyl jasaǵan jasóspirim arnaıy psıhonevrologııalyq esepte turǵan.