Lıftte qaza tapqan qostanaılyq jasóspirimge qatysty isti prokýratýra baqylaýǵa aldy
QOSTANAI. QazAqparat - Lısakov qalasynda turyp qalǵan lıftten óz erkimen shyqpaq bolǵan jasóspirimge qatysty is prokýratýranyń baqylaýyna alyndy, dep habarlaıdy QazAqparat qala prokýrory Erkin Táıkeshevke silteme jasap.
Eske salsaq, oqys oqıǵa 12 qańtar kúni saǵat 16:00-der shamasynda bolǵan.
«Qazirgi ýaqytta QR QK 306-baby (Qaýipsizdik talaptaryna saı kelmeıtin qyzmet kórsetý) boıynsha sotqa deıingi tergeý amaldary júrgizilip jatyr. Sot-medıtsınalyq saraptamasy taǵaıyndaldy. Qaıǵyly jaǵdaıǵa eski lıftidegi aqaý sebep boldy dep aıta almaımyn. Bul boljam ǵana. Barlyǵy saraptamadan soń belgili bolady. Іsti óz baqylaýymyzǵa aldyq», - dedi Erkin Táıkeshev agenttik tilshisine.
Atalǵan fakt boıynsha «Lısakovskıı lıft» JShS basshysy Oleg Melnık te jergilikti gazetter arqyly óz nusqasyn jarııalady. Onyń aıtýynsha, lıft kabınasynyń toqtap qalýyna basqa nárse sebep bolýy múmkin.
«Tómen túsip kele jatqan lıft arnaıy qaqqysh ústine toqtaǵan. Sol sebepti qaýipsizdik júıesi iske qosyldy. Jedelsaty syrtqy kúshterdiń áserinen toqtady. Oǵan kabınanyń teńselýin jatqyzýǵa bolady. Іshtegi jasóspirimder kórsetilgen dıspetcherlik qyzmetke habarlaspaı, ózderinshe qımyldaǵan. Tehnıka qaýipsizdigin saqtap, arnaıy mamandardy shaqyrǵanda bári basqasha bolar edi»,- dep esepteıdi O. Melnık.
