Lıftiden qorqatyn qarııa ákimdikten baspana 9-qabattan berilgenine ókpeli
AQTÓBE. QazAqparat - Turǵyn úı kezeginde turǵan Aqtóbe turǵyny, zeınetker Nasýha Jumaǵalıevaǵa bıyl bir bólmeli páter jalǵa berildi. Biraq onyń qýanyshy sý sepkendeı basylǵan. Sebebi baspana 9-qabatta ornalasqan. Joǵary qabatqa kóterile almaıtyn, lıftige minýden qorqatyn qarııa sheneýnikterge renishin bildirýde, dep habarlaıdy QazAqparat.
Aqtóbe oblysy, Oıyl aýdanynyń turǵyny Nasýha Jumaǵalıeva Amangeldi aýylynda mektep oqýshylaryna sabaq berip, 35 jyl boıy eńbek etti. Shákirtteri fılologııa, medıtsına salasynda úzdik atanyp, joǵary oqý oryndarynda sabaq beredi, bilikti dáriger. Fızıka pániniń muǵalimi zeınetke shyqqan soń, 1994 jyly Aqtóbe qalasyna kóshti. Úsh balasy bar. Bári de páter jaldap turady, áleýmettik jaǵdaıy tómen. Qarııa 2006 jyly páter kezegine turyp, jyl saıyn qalalyq ákimdiktiń habaryn alyp turdy.
Bıyl qarııaǵa ákimdikten 1 bólmeli páter berilgen. 12 jyl boıy kútken baspananyń 9-qabattan berilgenin aıtyp, kómek te surap barǵan. Biraq memlekettik qyzmetkerler aı saıyn tóletetin 4 myń teńgede astam páteraqysynyń túbirtegin qolyna ustatyp jiberýmen ǵana shekteledi eken. Kelisimshartqa qol qoıylǵanda páterdiń qabaty jazylmaǵan.
«Zeınetaqyǵa qyzymdy, otbasymdy baǵyp otyrmyn. Jylý, jaryq, gazdyń aqshasyn tóleımin. Qyzym men balasy - bólmede, ózim as bólmede uıyqtaımyn. Keıde tamaǵymyz bolmaı qalyp, qaıyrymdy jandar ákelip beredi. Ózime qajetti dári-dármek alý úshin kópqabatty jataqhana men úıdiń aýlasyn jınaımyn, sypyramyn. Qoqys jınap, aıyna 5 myń teńge alamyn»,- dedi Nasýha Jumaǵalıeva.
Zeınetker kez kelgen usynysty qabyldaýǵa daıyn. Tek joǵary qabatqa minip, túsýi áleginen qutqarýdy suraıdy.
«Jańasyn, úlkenin ber dep eshkimge aıtpaımyn. Maǵan eski úılerdiń birinen tómengi qabattan 1 bólme bolsa jaraıdy»,- deıdi ol.
Al ákimdik ókili óńirde páter keziginde turǵan adamdardyń bárine tek 9- qabattan páter berilip jatqanyn jetkizdi.
«Bıyl páter tek joǵary qabattan berildi. Biz joǵary qabattan páter beriletin kezde usynys aıtyp, kezekte turǵan adamdar kelisimin berdi. Zań boıynsha І-ІІ top múgedekterine tómengi qabattan beriledi. Al lıft bolsa, kelisim almaı joǵary qabattan beriledi. Árıne, jasyna qaraı tómengi qabattan páter berýge bolatyn edi, qazir tek joǵary qabatta bolyp tur»,- dedi Aqtóbe qalalyq turǵyn úı qoryn esepke alý sektorynyń meńgerýshisi Janargúl Dúısekenova.
Ardager-ustaz Nasýha Jumaǵalıeva ataqty taryshy Shyǵanaq Bersıevtiń aýylynda týyp-ósip, soǵys aıaqtalǵan soń mektepke bardy. Bútin kıim kımegen, toıyp tamaq ishpegen Nasýha Jumaǵalıeva ata-anasymen Shyǵanaq Bersıevtiń aýylyndaǵy mektepke arnalǵan kirpish quıý jumysyna qatysady. Keıin Oral qalasyndaǵy pedagogıkalyq ınstıtýtqa oqýǵa túsip, fızıka pániniń muǵalimi atandy. Qazir de fızıkanyń barlyq zańdylyqtary men formalasyn jatqa biledi. Mektep oqýshylaryna esep shyǵaryp, kómekteskendi jany súıedi. Zeınetke shyqqan soń arab álipbıin tanyp, arnaıy sabaq aldy.
«Qazir de fızıka pániniń esebin shyǵaramyn. Este saqtaý qabiletim joǵary, jańylmaı aıta alamyn. Keıde bar bilgenimdi aıtyp, úıretkim kelip turady. Biraq jan-jaǵymda ony túsinetin, uǵatyn adam joq. Aqyly oqyta almaımyn. Buryn oqymaǵan balany UBT daıyndaı da almaımyn. Keıin bilim alyp kelgen jas muǵalimderge de tańqalamyn»,- dedi ol.
Búginde zeınetker tańsáride turyp, aýla sypyrady, qoqys jınaıdy. Tústen keıin páterinde otyrady. Qartaıǵan shaǵynda kózi nashar kóre bastaǵan. Biraq áli de bolsa jumystan qol úzgisi kelmeıdi.
