Lıftidegi jýrnalıstiń qazasy: Jábirlenýshiler 5 mln teńge ótemaqy surady
AQTÓBE. QazAqparat - Aqtóbedegi lıftide mert bolǵan jýrnalıst Aızat Ábdisamattyń isine qatysty sot otyrysy jalǵasyp jatyr. Jábirlenýshi tarap 5 mıllıon teńge moraldyq ótemaqy surady, dep habarlaıdy QazAqparat tilshisi.
Aqtóbe qalalyq sotynda sottalýshy Jarylqasyn Aqjanov jábirlenýshi taraptan keshirim surap, óziniń kinásiz ekenin aıtty.
"Men ózimdi kináli dep eseptemeımin. Al 5 mıllıon teńge moraldyq shyǵyndy tóleı almaımyn. Ondaı aqsham joq. Jaǵdaıym kelgenshe kómektese alamyn. Ózim jolaqy úshin 6 myń teńgege lıft jóndegen adammyn", - dedi sottalýshy J.Aqjanov.
Al sottalýshy Kenen Janabekov óz kinásin moıyndamady, biraq jábirlenýshi suraǵan moraldyq ótemaqyny tolyq berdi.
Aıta keteıik, qaza bolǵan Aızat Ábdisamattyń anasy Aısha Tólemisova sottalýshylarǵa keshirim beretinin jetkizdi.
"Men keshirim berdim. Negizi sottalýshylar sol kúni kelip, kóńil aıtyp, keshirim suraýy kerek edi. Al olar arada 7 aı ótkende ǵana úıime keldi", - dedi Aızat Ábdásamattyń anasy Aısha Tólemisova.
Eske salsaq, osy jyldyń sáýir aıynda jýrnalıst Aızat Ábdisamat lıft esigine qysylyp,kóz jumǵan edi. Osy oqıǵaǵa baılanysty Qylmystyq kodekstiń «Qaýipsizdik talaptaryna saı kelmeıtin taýarlardy shyǵarý nemese satý, jumystardy oryndaý ne qyzmetter kórsetý» baby boıynsha aıyp taǵyldy.
Sot bastalmas buryn Aızat Ábdisamattyń anasy kináli adamdardyń jazalanýyn surady.
Erteń jaryssóz bolady.
