Lıftidegi qaıǵyly oqıǵa: Jýrnalıstiń týystary kinəlini sottaýdy surady
AQTÓBE. QazAqparat - Aqtóbe qalalyq sotynda jýrnalıst Aızat Ábdisamattyń isine qatysty sot otyrysy ótti. Jábirlenýshi tarap aıyptalýshylarǵa bas bostandyǵynan aıyrý jazasyn taǵaıyndaýdy surady, dep habarlaıdy QazAqparat tilshisi.
Aızat Ábdisamat lıft isten shyqqan kezde birinshi men ekinshi qabattyń arasynda qystyrylyp qalyp, aýa jetpeı qaza bolǵan. Buǵan deıin habarlaǵanymyzdaı, prokýror sot-medıtsınalyq saraptama qorytyndysyn jarııalap, lıftiniń tehnıkalyq aqaýy bolǵanyn, jaýapty adamdar jumysyna salǵyrt qaraǵanyn jetkizdi.
Al Aızat Ábdisamattyń kúıeýi Qaıyrjan Erqasymov aıyptalýshylardy zań aıasynda jazalap, bas bostandyǵynan aıyrý jazasyn surady. Sot otyrysyna marqum Aızat Ábdisamattyń anasy Aısha Tólemisova qatysyp, eshqandaı moraldyq shyǵyn suramaıtynyn jetkizdi.
«Lıft jóndelmegendikten, 28 jastaǵy qyzym qyrshynynan qıyldy. PIK basshylyǵy jaýapkershilikti óz moınyna almaǵandyqtan, qaıǵyly oqıǵa tirkelip otyr. Mundaı jaǵdaı eshkimniń basyna túspesin. Sottan ádil jaza kútemin. Ózim lıftini tekseretin, jóndeýdi mindetine alǵan PIK basshylyǵy jaýap berýi tıis dep esepteımin. Maǵan moraldyq shyǵyn kerek emes. Ólimge kináli adam jaýap berýi tıis. 3 jastaǵy balany «mama» degen sózdi aıta almaıtyn jaǵdaıǵa jetkizdi. Ólimdi kórgen sábı anasyn suramaıdy. Jaýapty adamdar mindetti túrde bas bostandyǵynan aıyrylýy tıis»,- dedi Aısha Tólemisova.
Sot otyrysy kezinde aıyptalýshy Kenen Janabekov te jaýap berdi. Ol lıftini jóndeý jumystary jeke adamǵa tapsyrylǵanyn, jóndeý jumystarynan soń teksermeıtinin jetkizdi.
Aıta keteıik, qazirgi ýaqytta qaıǵyly oqıǵa tirkelgen lıft iske qosylǵan joq. Arnaıy komıssııa tehnıkalyq talaptar, jóndeý jumystary kezinde qaýipsizdik saqtalmaǵanyn anyqtady. Qylmystyq kodekstiń «Qaýipsizdik talaptaryna saı kelmeıtin taýarlardy shyǵarý nemese satý, jumystardy oryndaý ne qyzmet kórsetý» baby boıynsha sot otyrysy jalǵasyp jatyr.
Eske salsaq, qaıǵyly oqıǵa osy jyldyń 4 sáýiri kúni Aqtóbe qalasynyń 12-yqshamaýdanynda boldy. Óziniń 3 jastaǵy qyzymen birge lıftige mingen 28 jastaǵy kelinshektiń denesi qabattar arasyna qystyrylyp qalǵan.
