Lıftide kúıeýinen soqqy jegen áıel istiń sotqa jetkenin qalaıdy

NUR-SULTAN. QazAqparat – Nur-Sultan qalasynda kúıeýinen lıft ishinde taıaq jegen áıel bolǵan jaǵdaıdyń zań aıasynda qaralýyn surap otyr. Bul týraly Nur-Sultan qalasy polıtsııa departamenti áıelderdi zorlyq-zombylyqtan qorǵaý bóliminiń aǵa ınspektory Gúlmıra Shyrahmetova málim etti, dep habarlaıdy QazAqparat tilshisi.

«Jábir kórgen áıelmen únemi baılanystamyn. Bolǵan jaǵdaıǵa qatysty qylmystyq is tirkeldi. Degenmen is sotqa jetpeı jatyr. Atalǵan otbasy búginde Shymkent qalasyna kóship ketti. Olar elordada turmaǵan. Nur-Sultan qalasyna oqıǵa bolardan 1 aı buryn ǵana kelgen. Qazir taıaq jegen áıel balalarymen birge óz ata-anasynyń úıinde turyp jatyr. Al kúıeýi bólek turady. Jábirlenýshi kúıeýin keshirgisi kelmeıdi jáne istiń sotta qaralǵanyn qalap otyr», - dedi Gúlmıra Shyrahmetova polıtsııa departamentinde ótken baspasóz máslıhatynda.

Onyń aıtýynsha, úıdiń úlkenderi otbasylyq kıkiljińniń burynnan baryn bilgen.

«Áıeldi kúıeýinen qorǵaý paraqshasy alyndy, degenmen onyń ýaqyty bitti. Ázirge odan kúıeýine qatysty basqasha aryz, shaǵym túspedi», - deıdi ol.

Polıtsııa departamenti ókilderiniń málimetinshe, is sotqa jetse elordada qaralatyn bolady.

Eske sala ketsek, bıyl mamyrda Nur-Sultan qalasynda lıft ishinde áıeldi soqqyǵa jyǵyp jatqan er adam týraly vıdeo jelide taraǵan edi.

Keıin polıtseıler jábirlenýshini anyqtap, er adamǵa qatysty qylmystyq is qozǵady.