Lıftide qaza bolǵan jýrnalıstiń anasy málimdeme jasady

Aqtóbe qalasyndaǵy 12 yqsham aýdanynda bir aıdan astam ýaqyt buryn qaıǵyly oqıǵa tirkeldi. Nebári 28 jastaǵy jýrnalıst Aızat Ábdisamat úsh jastaǵy qyzymen lıftige minip, sol jerde mert boldy. Buǵan deıin habarlaǵanymyzdaı, jas kelinshekti kúıeýi lıfti ishinde qystyrylyp turǵan jerinen alyp shyqqan. Sol jerde balasy da boldy.

Al bir aıdan soń Aqtóbe oblystyq energetıka jáne turǵyn úı-kommýnaldyq sharýashylyq basqarmasy lıftiniń avtomatıkasy isten shyqqanyn tekserý kezinde anyqtady. Lıft mamandarynyń qorytyndysy ishki ister organdaryna berilgen.

Mán-jaıdy bilip otyrǵan Aızat Ábdisamattyń otbasy kinálilerdiń jazalanýyn talap etti.

«Qyzymnyń qazasy kúıeý balama da aýyr tıdi. Olar uıqydan aıyryldy. Kishkentaı qyzy anasyn kóp izdemeıdi. Bala bolsa da mamasynyń endi kelmesin sezedi. Sýretin kórgende ǵana «Aızat, Aızat» dep eleńdeıdi. Keıin «meniń mamam lıftige qysylyp qaldy, mamam «pomogıte» dep aıqaılady» dep qaıtalaıdy. Balada qorqynysh bar. Kólik ishinde otyrǵanda da «qolyńnan ustap otyraıyn, qulap qalmashy» dep janyndaǵy adamnyń qolynan aıyrylmaıdy. Arada 40 kún ótti. Biz sadaqany ótkizip, lıftterdi tekserý aıaqtalǵanyn bilip otyrmyz. Barlyq aıǵaq bar, lıfttiń isten shyqqany belgili, biraq is sotqa jeter emes. Kináli adamdardyń jazalanǵanyn talap etemiz»,- dedi Aızat Ábdisamattyń anasy Aısha Tólemisova. 

Qaza bolǵan jas kelinshektiń otbasy lıftige qyzmet kórsetetin «Jánibek servıs» PIK jaýapqa tartylýy tıis dep esepteıdi.

«Turǵyndar lıftiniń jıi toqtap qalyp, ishinde qamalǵanyn aıtyp jatyr. Baýyrym kóz jumdy. Biraq biz mundaı qaıǵyly oqıǵanyń qaıtalanbaýyn qalap, lıftke jaýapty kompanııanyń jaýapqa tartylýyn suraımyz. Páter ıeleri kooperatıviniń ókili kelgen kezde «onyń ajaly» dep aıtyp ketti. Jylap otyrǵanda osy sóz janymyzǵa batty. 4 jyl boıy sol lıftige minip júrgen Aızattyń qaýipsizdikti saqtamaýy múmkin emes»,- Aızat Ábdisamattyń apasy Gúljaınar Qarasholaqova.

Aıta keteıik, lıftidegi qaıǵyly oqıǵaǵa baılanysty «Sapasyz salynǵan qurylys» baby boıynsha tergeý júrip jatyr. Birneshe saraptama taǵaıyndaldy.

Jas kelinshek qaza bolǵan lıft esigi sol kúıi ashyq tur. Turǵyndar esik aldyna aǵash qoıǵan.