Lıftide balany pyshaqtaǵan jasóspirimniń isi bir aı ishinde sotqa jiberiledi — ІІM

ASTANA. KAZINFORM — Qazir atalǵan jaıtqa qatysty tergeý amaldary jalǵasyp jatyr.

— Sot-psıhıatrııalyq saraptama taǵaıyndaldy. Biz tergeýdi bir aı ishinde aıaqtap, qylmystyq is materıaldaryn prokýror arqyly sotqa jiberýdi josparlap otyrmyz, — dedi Іshki ister mınıstriniń orynbasary Sanjar Ádilov Májilis qabyrǵasynda BAQ ókilderiniń saýalyna jaýap bere turyp.

Mınıstr orynbasarynyń málimdeýinshe, jasóspirimge qatysty jaza onyń áreketiniń saralanýy men sottyń sheshimine baılanysty taǵaıyndalýy múmkin. 

— Asa aýyr qylmys jasaldy, quqyqtyq baǵany sot beredi. Sot sheshimin boljaý nemese túsinikteme berý meniń quzyretime kirmeıdi, — dep túıindedi S. Ádilov.

Eske sala keteıik, bıyl 11 aqpanda elordada jasóspirim lıfti ishinde balany pyshaqtap tastaǵan edi. Keıin belgili bolǵandaı pyshaqpen shabýyldaǵan jasóspirim arnaıy esepte turǵan. 

Dárigerler zardap shekken balaǵa dereý ota jasap, psıhologııalyq kómek kórsetti. 

Qazir balany pyshaqtaǵan jasóspirim psıhıatrııalyq statsıonarǵa ornalastyryldy.

Óz kezeginde Densaýlyq saqtaý mınıstriniń orynbasary Erjan Nurlybaev jasóspirimniń ortaǵa beıim jaǵdaıda bolǵanyn aıtty.

Sondaı-aq keıin anyqtalǵandaı lıftide balany pyshaqtaǵan jasóspirimdi jalǵyzbasty ana tárbıelep otyr. 

Aıta ketsek, elordada kópqabatty turǵyn úılerdiń birinde lıftide balany pyshaqtaǵan jasóspirimniń anasy psıhıkalyq densaýlyq ortalyǵynda ulyn urǵany týraly polıtsııaǵa shaǵym túsirgen edi.

Keıin Densaýlyq saqtaý mınıstri Aqmaral Álnazarova elordada lıftide balany pyshaqtaǵan jasóspirimdi urdy degen faktige qatysty túsinik berdi.