Lıftide balany pyshaqtaǵan jasóspirimge qatysty sot úkimi shyqty
ASTANA. KAZINFORM — Astana qalasy kámeletke tolmaǵandardyń isteri jónindegi mamandandyrylǵan aýdanaralyq sotynda lıftide balany pyshaqtaǵan jasóspirimniń isi qaraldy.
Jasóspirim psıhonevrologııalyq dıspanserde esepte turatyndyqtan májbúrlep emdeýge jiberiletin boldy.
- Astana qalasynyń kámeletke tolmaǵandardyń isteri jónindegi mamandandyrylǵan aýdanaralyq sotyna 14 jasar K.- ge qatysty medıtsınalyq sıpattaǵy májbúrleý sharalaryn qoldaný týraly qaýlysy bar qylmystyq is kelip tústi (QK 293-baby 3-bóligi 2)tarmaǵy). Sot K.-nyń II toptaǵy múgedek ekenin, psıhonevrologııalyq dıspanserde esepte tura otyryp, 2025 jylǵy 11 aqpanda turǵyn úı kesheniniń lıftinde bolǵan kezde kámeletke tolmaǵan adamǵa ıaǵnı E.-niń denesine zaqym keltirip, onyń betine pyshaqpen jaraqat salǵanyn anyqtady, - delingen sot habarlamasynda.
Sot psıhologııalyq-psıhıatrııalyq saraptamanyń qorytyndysyna sáıkes jasóspirim sozylmaly psıhıkalyq aýrýdyń saldarynan, áreket kezeńinde óziniń is-qımylynyń naqty sıpaty men áleýmettik qaýiptiligin túsinbegen jáne olardy basqara almaǵan, psıhıkalyq jaǵdaıy boıynsha ózine jáne qoǵamǵa qaýip tóndirgen.
Ol májbúrlep emdeýdi qajet etedi.
QK 16-babynyń talaptaryna sáıkes, qoǵamǵa qaýipti is-áreket jasaǵan ýaqytta esi durys emes kúıde bolǵan adam qylmystyq jaýaptylyqqa tartylmaıdy.
Esi durys emes dep tanylǵan adamǵa sot medıtsınalyq sıpattaǵy májbúrleý sharalaryn qoldana alady.
- Sot qaýlysyna sáıkes, K.-ge Talǵar aýdany Aqtas aýylyndaǵy qarqyndy baqylanatyn mamandandyrylǵan úlgidegi mekemede statsıonarlyq májbúrlep emdeý taǵaıyndaldy, - dep habarlady sottan.
Qaýly zańdy kúshine engen joq.
Eske sala keteıik, bıyl 11 aqpanda elordada jasóspirim lıfti ishinde balany pyshaqtap tastaǵan edi. Keıin belgili bolǵandaı pyshaqpen shabýyldaǵan jasóspirim arnaıy esepte turǵan.
Dárigerler zardap shekken balaǵa dereý ota jasap, psıhologııalyq kómek kórsetti.
Qazir balany pyshaqtaǵan jasóspirim psıhıatrııalyq statsıonarǵa ornalastyryldy.
Óz kezeginde Densaýlyq saqtaý mınıstriniń orynbasary Erjan Nurlybaev jasóspirimniń ortaǵa beıim jaǵdaıda bolǵanyn aıtty.
Sondaı-aq keıin anyqtalǵandaı lıftide balany pyshaqtaǵan jasóspirimdi jalǵyzbasty ana tárbıelep otyr.
Aıta ketsek, elordada kópqabatty turǵyn úılerdiń birinde lıftide balany pyshaqtaǵan jasóspirimniń anasy psıhıkalyq densaýlyq ortalyǵynda ulyn urǵany týraly polıtsııaǵa shaǵym túsirgen edi.
Keıin Densaýlyq saqtaý mınıstri Aqmaral Álnazarova elordada lıftide balany pyshaqtaǵan jasóspirimdi urdy degen faktige qatysty túsinik berdi.
Lıftide balany pyshaqtaǵan jasóspirimniń isi bir aı ishinde sotqa jiberiletinin jazǵan bolatynbyz.