Lıftide balany pyshaqtaǵan jasóspirim isi: taǵy bir qylmystyq is qozǵaldy

ASTANA. KAZINFORM — Psıhıkalyq aýytqýy bar jasóspirimniń anasy aýrýhanada balamdy urdy dep polıtsııaǵa shaǵym túsirgen bolatyn. Atalǵan jaıtqa qatysty qylmystyq is qozǵaldy.

 Bul týraly Іshki ister mınıstriniń orynbasary Sanjar Ádilov málim etti.

— Kámeletke tolmaǵan kúdiktige dene jaraqatyn salǵan sanıtarǵa qatysty aqparatqa keletin bolsaq, bul fakti boıynsha sotqa deıingi tergeý amaldary júrip jatyr. Qylmystyq is qozǵaldy. Qazir barlyq mán-jaıdy anyqtaý úshin keshendi tergeý júrip jatyr, — deıdi Sanjar Ádilov Májilis qabyrǵasynda BAQ ókilderiniń saýalyna jaýap bere turyp.

Buǵan deıin Іshki ister mınıstriniń orynbasary lıftide balany pyshaqtaǵan jasóspirimniń isi bir aı ishinde sotqa jiberý josparda baryn aıtqan edi. 

Eske sala keteıik, bıyl 11 aqpanda elordada jasóspirim lıfti ishinde balany pyshaqtap tastaǵan edi. Keıin belgili bolǵandaı pyshaqpen shabýyldaǵan jasóspirim arnaıy esepte turǵan. 

Dárigerler zardap shekken balaǵa dereý ota jasap, psıhologııalyq kómek kórsetti.

Qazir balany pyshaqtaǵan jasóspirim psıhıatrııalyq statsıonarǵa ornalastyryldy.

Óz kezeginde Densaýlyq saqtaý mınıstriniń orynbasary Erjan Nurlybaev jasóspirimniń ortaǵa beıim jaǵdaıda bolǵanyn aıtty. 

Sondaı-aq keıin anyqtalǵandaı lıftide balany pyshaqtaǵan jasóspirimdi jalǵyzbasty ana tárbıelep otyrǵany belgili boldy.

Aıta ketsek, elordada kópqabatty turǵyn úılerdiń birinde lıftide balany pyshaqtaǵan jasóspirimniń anasy psıhıkalyq densaýlyq ortalyǵynda ulyn urǵany týraly polıtsııaǵa shaǵym túsirgen edi.

Keıin Densaýlyq saqtaý mınıstri Aqmaral Álnazarova elordada lıftide balany pyshaqtaǵan jasóspirimdi urdy degen faktige qatysty túsinik berdi.