Lıft esigin tepkilep, isten shyǵarǵan aqtóbelikter jaýapqa tartyldy
AQTÓBE. KAZINFORM – Úsheýi de ishimdik iship, kópqabatty úıdiń ortaq múlkin búldirdi. Bir kúnnen soń olar 5 jáne 10 táýlikke qamaldy.
Aqtóbe qalasyndaǵy kópqabatty úılerdiń birinde lıftke úsh jigit minip, keıin biri aıaǵymen esigin tepkilep, judyryqtaıdy. Saldarynan lıft esigi maıysyp, durys jabylmaı qalǵan. Turǵyndar osy oqıǵadan keıin lıft esigi tolyq jabylmaı qalǵanyn aıtyp, toqtatyp qoıdy. Polıtsııa beınejazba arqyly qala turǵyndaryn izdep taýyp, ákimshilik jazaǵa tartty.
- Polıtsııa quqyq buzýshylardyń kim ekenin jedel anyqtap, polıtsııa bólimine jetkizdi. Lıftini qasaqana búldirgen sol úıdiń turǵyny Bekzat Quraqbaev bolyp shyqty. Oǵan jáne Aqtóbe oblysynyń turǵyndary Azamat Torymov pen Salamat Joldybaıǵa ákimshilik zańnamanyń úsh baby boıynsha hattama toltyryldy. Olar qoǵamdyq orynda mas kúıde júrý, tynyshtyqty buzý jáne usaq buzaqylyq áreketteri úshin sotqa jetkizildi. Sot sheshimmen quqyq buzýshylardyń úsheýi de ákimshilik qamaqqa alyndy. Lıfti esigin tepken jaýapker 10 táýlikke, qalǵan ekeýi 5 táýlikke qamaldy,- dep habarlady Aqtóbe oblystyq PD baspasóz qyzmeti.
Lıftti búldirgen aqtóbelik mas bolyp qalǵanyn, isine ókinetinin aıtyp, keshirim surady.
Buǵan deıin habarlaǵanymyzdaı, Qyzylordada prank úshin lıftide tóbeles shyǵarǵan turǵyn jazalandy. Lıftide sózge kep qalǵandardyń áreketi tóbeleske ulasqan.