Lıtsenzııasyz jumys istegen kolledj: Dırektor sebebin aıtty
QOSTANAI. QazAqparat - Qostanaıdaǵy áleýmettik bilim berý kolledji bir jyldan astam ýaqyt boıy stýdentterdi ruqsatsyz oqytyp kelgen. Atalǵan jaıtqa qatysty oqý ornynyń dırektory Márııash Qadyralınova túsinik berdi, dep habarlaıdy QazAqparat.
Kolledj basshysy 2017 jyldan bastap lıtsenzııanyń joqtyǵyn rastady. Onyń aıtýynsha, bilim oshaǵy ákimshilik sot sheshimimen oqytý ruqsatynan aıyrylǵan.
«Biz byltyrǵy jyldyń qazan aıynan bastap lıtsenzııany qalpyna keltirý jumystarymen aınalysyp kelemiz. Tıisti organǵa alǵash ret 3 qarashada qujattarymyzdy tapsyrdyq. Ereje boıynsha, qujat tapsyrylǵan kúnnen bastap kolledjdiń lıtsenzııasyz qyzmeti keıinge shegerilýi tıis. Ýaqyty kelgende oqý orny jańa ruqsat qaǵazyna ıe bolady», - dep túsindirdi basshy.
Dırektordyń sózinshe, kolledj ózine tıesili ǵımaraty bolmaǵan soń oqytý ruqsatynan aıyryldy. Oqý protsesi kezinde menshik ıeleri qaladaǵy nysandy jalǵa alǵan. Sonymen qatar, byltyrǵy oqý jylynyń basynda birneshe stýdent basqa kolledjderge aýysyp ketken. Alaıda, bilim alýshylardyń kóbi bul oqý ornynan ketkisi joq.
«Búginde bizde 89 stýdent bilim alady. Onyń 15-i - múmkindigi shekteýli jandar. Men olardyń dıplom alýlaryna barynsha jaǵdaı jasaımyn. Eshqandaı zań talaptarynyń buzylmaýyna baılanysty Əleýmettik bilim berý kolledjine lıtsenzııa berilýine qol jetkizemiz», - dedi M.Qadyralınova.
Aıta keteıik, bir jyldan astam lıtsenzııasyz jumys istep kelgen kolledj máselesi oblys ákiminiń qatysýymen ótken alqa májilisinde kóterilgen bolatyn.
Illıýstratsııalyq foto
