Lıtsenzııasyz baǵdarlamalyq qamsyzdandyrýdy qoldanýshylar 3 jaǵdaıdyń birinde vırýsqa tap bolady
ALMATY. 6 naýryz. QazAqparat - Halyqaralyq derekter korporatsııasy (International Data Corporation - IDC) Microsoft korporatsııasynyń qoldaý kórsetýimen ótkizgen jańa zertteý málimetterin jarııalady. Oǵan qaraǵanda lıtsenzııasy joq baǵdarlamalyq qamsyzdandyrýdy qoldanatyn jekelegen qoldanýshylarda 3 jaǵdaıdyń birinde kompıýterlik vırýsty juqtyratyny, korporatıvtik qoldanýshylarda bul 10 jaǵdaıdyń birinde kezdesetini anyqtaldy.
Maıkrosoft Qazaqstan kompanııasynyń baspasóz qyzmetiniń habarlaýynsha, vırýsty juqtyrǵan jaǵdaıda ony anyqtap, saldaryn joıý úshin qoldanýshylar 1,5 mlrd. saǵat ýaqyty men 22 mlrd. dollaryn jumsaýyna týra keledi. Korporatsııalar bolsa, vırýstyq kıbershabýyldardyń saldaryn joıý úshin 114 mlrd. dollar jumsaıdy eken.
Kompıýter qoldanýshylardyń keıbireýleri qaraqshylyq baǵdarlamalyq qamsyzdandyrý arqyly qarjysyn únemdep qalýǵa tyrysady, alaıda olar osyndaı jaǵdaılarda kompıýterlik vırýsty juqtyryp alý qaýpi birneshe ese artatynyn túsine bermeıdi. Zertteýshiler kompıýtermen birge satyp alynbaǵan jalǵan baǵdarlamalyq qamsyzdandyrýdyń 45 paıyzy ınternet jelisinen júktelgenin anyqtady. Olardyń 78 paızynda qandaı da bir vırýs bar bolyp shyqsa, 36 paıyzy Troıanmen nemese oǵan uqsas baǵdarlamalarmen juqtyrylǵan. Zertteý qorytyndylaryna qaraǵanda: saýalnamaǵa jaýap berýshilerdiń 64 paıyzy jalǵan baǵdarlamalyq qamsyzdandyrýdy qoldanýshylar qaýipsizdikke qater tóndiretin qıyndyqtarǵa tap bolatynyn biledi. 45 paıyz jaǵdaıda jalǵan baǵdarlamalyq qamsyzdandyrý derbes kompıýterdiń jumys jyldamdyǵyn tómendetip, ony kompıýterden alyp tastaýǵa sebep bolǵan.
