Lıtsenzııany toqtatamyz – Tsoı dárini qymbatqa satýǵa qatysty eskertý jasady

NUR-SULTAN. QazAqparat – Densaýlyq saqtaý mınıstri Alekseı Tsoı dári-dármekti shekti baǵasynan qymbatqa satqany úshin jaýapkershilik baryn taǵy da eskertti, dep habarlaıdy QazAqparat tilshisi.

«Dári-dármekti shekti baǵasynan qymbatqa satqany úshin jaýapkershilik qarastyrylǵanyn eskertkim keledi. Naqtyraq aıtqanda olarǵa aıyppul salynady. Al eger bul zań buzýshylyq qaıtadan tirkelse, dárihananyń lıtsenzııasyn toqtatýǵa deıingi sharany qabyldaımyz. Sonymen birge dári-dármekti retseptsiz satqany úshin de jaýapkershilik baryn eskertemiz. Internet arqyly retseptsiz satý jaǵdaılary tirkeldi. Mundaı jaǵdaılar zańmen qadaǵalanady», - dedi Alekseı Tsoı OKQ-da ótken baspasóz máslıhatynda.

Eske sala ketsek, búgin QR Premer-Mınıstri Asqar Mamınniń tóraǵalyǵymen ótken Memlekettik komıssııa otyrysynda QR Prezıdenti Qasym-Jomart Toqaevtyń tapsyrmasyna sáıkes Qazaqstandaǵy epıdemıologııalyq ahýaldy turaqtandyrý sharalary qaralǵan bolatyn. Memlekettik komıssııanyń sheshimimen 5 shildeden bastap 14 kúnge qatań shekteý sharalaryn engizetin boldy.