Lıberııada maımyl sheshegin juqtyrǵandar sany 78-ge jetti

ASTANA. KAZINFORM – Batys Afrıkadaǵy Lıberııa Respýblıkasynda jyl basynan beri maımyl sheshegi (mpox) vırýsyn juqtyrýdyń 78 jaǵdaıy tirkeldi, dep jazady Anadoly.

Ulttyq qoǵamdyq densaýlyq saqtaý ınstıtýtynyń (NPHIL) basshysy Dýgbe Krıs Nıannyń habarlaýynsha, elde qaýipti vırýsty juqtyrýdyń taǵy tórt jańa jaǵdaıy anyqtalǵan.

Vırýs taralýynyń aldyn alý sharalary aıasynda Lıberııa ótken aıda Eýropalyq komıssııanyń tótenshe jaǵdaılar jónindegi densaýlyq saqtaý bóliminen mpox vırýsyna qarsy 10,8 myń doza vaktsına alǵan.

Janýarlar men adamdar arqyly juǵady

Maımyl sheshegi egeýquıryqtar men tıinder sııaqty kemirgishterden, sondaı-aq osy vırýsqa shaldyqqan adamdardan juǵady. Alǵashqy belgiler ádette juqqannan keıin 5-21 kún ishinde paıda bolady. Olarǵa joǵary temperatýra, bas, arqa jáne bulshyqet aýrýy, lımfa túıinderiniń ulǵaıýy, álsizdik, qaltyraý jáne teridegi bórtpeler jatady.

Mpox vırýsyna qarsy naqty em joq. Emdeý antıvırýstyq preparattarmen júrgiziledi. Kóptegen naýqas aýrýdy jeńil túrde ótkerip, birneshe apta ishinde saýyǵyp ketedi.

Buǵan deıin Kongoda maımyl sheshegimen aýyrǵan 128 adam emdeý ortalyqtarynan qashyp ketkenin jazdyq.

Dúnıejúzilik densaýlyq saqtaý uıymy maımyl sheshegi (mpox) vırýsyna qarsy ekinshi vaktsınany maquldady.