Lıberııada $336 mln turatyn kokaın tárkilengennen keıin 12 sheneýnik jumystan qýyldy
ASTANA. KAZINFORM – Lıberııa prezıdenti Djozef Boakaı elde iri kólemdegi kokaınniń tárkilenýinen keıin 12 memlekettik qyzmetkerdi jumystan bosatyp, taǵy birneshe laýazymdy tulǵanyń isin tergeýge joldady, dep habarlaıdy Kazinform agenttiginiń menshikti tilshisi Euronews-ke silteme jasap.
Qyzmetinen bosatylǵandardyń qatarynda halyqaralyq áýejaı qyzmetkerleri men quqyq qorǵaý organdarynyń basshylary bar.
Shilde aıynda Lıberııa bıligi Roberts halyqaralyq áýejaıynyń mańynan shamamen tórt tonna kokaın tárkilegen. Onyń naryqtaǵy quny 317 mln dollar dep baǵalandy.
Buǵan deıin, maýsym aıynda, áýejaıdaǵy kommertsııalyq júk arasyndaǵy Maggi dámdeýishteriniń qaptamalarynyń ishinen shamamen 238 keli kokaın tabylǵan. Onyń quny 19 mln dollar bolǵan.
Prezıdent ákimshiliginiń habarlaýynsha, memleket basshysy esirtkiniń zańsyz aınalymyna qatysty ister boıynsha aralyq tergeý qorytyndysymen tanysqannan keıin birqatar memlekettik qyzmetker men quqyq qorǵaý organdarynyń ókilderin qyzmetinen bosatý, ýaqytsha shettetý jáne tekserý týraly tapsyrma bergen.
Jumystan shyǵarylǵandardyń qatarynda áýejaı dırektorynyń operatsııalyq qyzmet jónindegi orynbasary, polıtsııanyń qylmystyq tergeý, barlaý jáne Interpolmen ózara is-qımyl bólimshesiniń basshysy, sondaı-aq Ulttyq qaýipsizdik agenttigi dırektorynyń ákimshilik máseleler jónindegi orynbasary bar.
Sonymen qatar prezıdent kokaınniń eki iri partııasyna qatysty aıyp taǵylǵan barlyq memlekettik qyzmetshiler men quqyq qorǵaý organdarynyń ókilderin qyzmetinen bosatty.
Olardyń arasynda áýejaıdyń qaýipsizdik qyzmetiniń dırektory men áýejaıda jumys istegen Lıberııanyń Esirtkimen kúres agenttigi bólimshesi komandıriniń orynbasary da bar.
Budan bólek, Ulttyq qaýipsizdik agenttigi men Genderlik teńdik, balalar jáne áleýmettik qorǵaý mınıstrliginiń tórt qyzmetkeri jumystan shyǵaryldy. Olardyń isteri qylmystyq qýdalaý úshin Ádilet mınıstrligine joldandy.
Eske salaıyq, maýsym aıynda kokaınniń alǵashqy iri partııasy tárkilengennen keıin prezıdent Djozef Boakaı bul iske qatysy bar barlyq tulǵany jaýapkershilikke tartý úshin keshendi tergeý júrgizýdi tapsyrǵan bolatyn.
Osyǵan deıin «Sınaloa» esirtki karteliniń basshysy ómir boıyna bas bostandyǵynan aıyrylǵany týraly jazdyq.
