Lıberııada 336 mln dollarlyq kokaın tárkilengennen keıin 12 sheneýnik qyzmetinen bosatyldy
ASTANA. KAZINFORM – Lıberııa prezıdenti Djozef Boakaı iri kólemdegi kokaınniń tárkilenýinen keıin 12 memlekettik qyzmetkerdi jumystan shyǵaryp, taǵy birneshe laýazymdy tulǵanyń isin tergeýge jiberdi, dep habarlaıdy Euronews.
Qyzmetinen bosatylǵandardyń qatarynda áýejaı qyzmetkerleri men quqyq qorǵaý organdarynyń basshylary bar.
Shilde aıynda Lıberııa bıligi Roberts halyqaralyq áýejaıynyń mańynan shamamen tórt tonna kokaın tárkiledi. Onyń naryqtaǵy quny 317 mln dollar dep baǵalanǵan.
Buǵan deıin, maýsym aıynda, taǵy bir iri esirtki partııasy qolǵa túsken bolatyn. Sol kezde áýejaıda dámdeýish ónimderi, onyń ishinde Maggi qaptamalary salynǵan kommertsııalyq júk arasynan quny shamamen 19 mln dollar bolatyn 238 keli kokaın tabylǵan.
Prezıdent ákimshiliginiń habarlaýynsha, memleket basshysy zańsyz esirtki aınalymyna qatysty iri ister boıynsha aralyq tergeý esebimen tanysqannan keıin birqatar memlekettik qyzmetker men quqyq qorǵaý organy qyzmetkerlerin dereý qyzmetinen bosatýdy, ýaqytsha shettetýdi jáne tekserýdi tapsyrǵan.
Jumystan shyǵarylǵandardyń qatarynda áýejaı dırektorynyń operatsııalyq qyzmet jónindegi orynbasary, polıtsııanyń qylmystyq tergeý, barlaý jáne Interpolmen ózara is-qımyl bólimshesiniń basshysy, sondaı-aq Ulttyq qaýipsizdik agenttigi dırektorynyń ákimshilik máseleler jónindegi orynbasary bar.
Prezıdent esirtkiniń eki iri partııasyna qatysty aıyp taǵylǵan barlyq memlekettik qyzmetkerler men quqyq qorǵaý organdarynyń ókillerin de qyzmetinen bosatty.
Olardyń qatarynda áýejaıdyń qaýipsizdik qyzmetiniń dırektory jáne Lıberııanyń Esirtkige qarsy kúres agenttiginiń áýejaıdaǵy bólimshesi komandıriniń orynbasary bar.
Sonymen qatar Ulttyq qaýipsizdik agenttigi men Genderlik teńdik, balalar jáne áleýmettik qorǵaý mınıstrliginiń tórt qyzmetkeri de jumystan shyǵaryldy. Olardyń isteri qylmystyq qýdalaý úshin Ádilet mınıstrligine joldandy.
Maýsym aıynda áýejaıda alǵashqy esirtki partııasy tárkilengennen keıin Djozef Boakaı osy iske qatysy bar barlyq tulǵany zań aıasynda jaýapkershilikke tartý úshin úılestirilgen tergeý júrgizýdi tapsyrǵan bolatyn.
Aıta keteıik, Grýzııada esirtki qylmysyna qatysy bar 120-dan astam adam ustaldy.
Sondaı-aq Meksıkada «Sınaloa» esirtki karteliniń basshysy ómir boıyna bas bostandyǵynan aıyryldy.
