Lı ıÝntsıýan: Qazaqstan kópvektorly dıplomatııa arqyly óńirlik rólin kúsheıtip keledi
ASTANA. KAZINFORM – Qytaı Memlekettik keńesi janyndaǵy Damý zertteý ortalyǵynyń Eýropa jáne Azııanyń áleýmettik damýy ınstıtýty Ǵylymı keńesiniń tóraǵasy Lı ıÝntsıýan Kazinform agenttigine bergen suhbatynda Qazaqstannyń kópvektorly dıplomatııa saıasaty kúrdeli halyqaralyq jaǵdaıda tepe-teńdik saqtaýǵa múmkindik berip, eldiń óńirlik rólin kúsheıtip otyrǵanyn atap ótti.
Qazaqstanǵa qatysty pikir bildirgen Lı ıÝntsıýan, eldiń iri derjavalardyń básekesine tartylmaı, ashyq dıalog pen kópjaqty baılanys arqyly derbes dıplomatııalyq ustanym qalyptastyryp otyrǵanyn aıtty.
«Qazaqstan kúrdeli halyqaralyq qatynastardy retteýde sabyrly ári ıkemdi tásil kórsetip keledi», — dedi ol.
Onyń aıtýynsha, mundaı ustanym Qazaqstanǵa túrli taraptarmen baılanys ornatyp, kópjaqty alańdarda óz pozıtsııasyn erkin bildirýge múmkindik beredi.
Ol sondaı-aq Prezıdent Qasym-Jomart Toqaev usynǵan kópvektorly dıplomatııa tujyrymdamasy qazirgi jaǵdaıda ózektiligin arttyryp, óńirdegi dıalog keńistigin keńeıtýge yqpal etip otyrǵanyn atap ótti.
«Qazaqstan energetıka men ınfraqurylym salasyndaǵy yntymaqtastyqty júıeli túrde jalǵastyryp qana qoımaı, jasyl ekonomıka, jasandy ıntellekt jáne qoǵamdyq-saıası jańǵyrtý salalarynda da belsendi ustanym tanytyp otyr. Bul eldiń zamanaýı damý arqyly strategııalyq derbestigin arttyrýǵa degen naqty umtylysyn kórsetedi», — dedi Lı ıÝntsıýan.
Qytaı men Qazaqstan arasyndaǵy yqpaldastyqtyń keleshegine toqtala kele, ol ınfraqurylymdyq baılanys áli de mańyzdy negiz bolyp qala beretinin, alaıda yntymaqtastyqtyń baǵyttary tsıfrlyq basqarý, jasyl transformatsııa jáne óńirlik úılestirý áleýetin arttyrý salalaryna qaraı keńeıip kele jatqanyn aıtty.
Onyń baǵalaýynsha, Qazaqstan “Orta dáliz” sııaqty bastamalarda aıtarlyqtaı yqpalǵa ıe bolyp, «kommýnıkatsııalyq memleket» retindegi róli barǵan saıyn aıqynyraq baıqalýda.
Aıta keteıik, elordada ІІ Astana Think Tank Forum-2025 halyqaralyq forýmy ótip jatyr. Іs-shara aıasynda Ortalyq Azııa saraptamalaryn álemdik zertteý qaýymdastyqtarmen biriktiretin platforma iske qosyldy.