Lı Chje Men Ońtústik Koreıa prezıdenti saılaýynda jeńiske jetti: ol kim
ASTANA. KAZINFORM — Ońtústik Koreıada ótken prezıdenttik saılaýda «Tobýro» Demokratııalyq partııasynyń atynan qatysqan Lı Chje Men jeńiske jetti, dep jazdy Kazinform agenttiginiń tilshisi.
Qazirgi tańda saılaýshylardyń daýysy sanalyp, 100% nátıjesi jarııalandy. Lı Chje Men 49,42% daýys jınasa, qarsylasy Kım Mýn Sý — 41,15% daýysqa ıe boldy.
61 jastaǵy Lı Chje Men alǵash ret 2017 jyly Demokratııalyq partııa ishindegi praımerız kezinde el nazaryna ilikken edi. 2022 jylǵy prezıdenttik saılaýda ol ıÝn Sok Elge azdaǵan aıyrmashylyqpen jeńilip qalǵan.
2024 jylǵy jalpy saılaý barysynda Lı qaıta saılanyp, Demokratııalyq partııany jeńiske jetkizdi. Osy arqyly ol oppozıtsııadaǵy negizgi kóshbasshy jáne ıÝn Sok El ákimshiliginiń basty synshysy retindegi bedelin kúsheıtti, dep jazady Asia Pacific Foundation of Canada.
Atalǵan saraptamalyq ortalyqtyń málimetinshe, Lı Chje Mennyń baǵdarlamasy pragmatıkalyq syrtqy saıasatqa negizdelgen. Ol Soltústik jáne Ońtústik Koreıa arasyndaǵy senimdi nyǵaıtýǵa, sondaı-aq Qytaı jáne Reseımen qarym-qatynasty jaqsartýǵa basymdyq beredi. Sonymen qatar, ol zymyranǵa qarsy qorǵanys jáne soqqy berý qabiletterin kúsheıtýdiń mańyzyn moıyndaıdy. Soǵys jaǵdaıynda Ońtústik Koreıaǵa birikken amerıkalyq-koreılik kúshterdiń operatıvtik basqarýyn berý qajet dep esepteıdi.
Yonhap agenttiginiń habarlaýynsha, Lı óziniń saılaýaldy naýqanynda ıÝn Sok El basqarǵan «satqyn kúshterdi» basamyz dep ýáde bergen. Bul ıÝn Sok Eldiń ımpıchmentinen keıin aıtylǵan málimdeme bolatyn.
2025 jylǵy 3 maýsymda Ońtústik Koreıada prezıdenttik saılaý ótti. Bastapqyda bul saılaý 2027 jylǵa josparlanǵan bolatyn, alaıda ıÝn Sok Eldiń qyzmetinen shettetilýine baılanysty merziminen buryn ótkizildi. 2025 jylǵy 4 sáýirde Konstıtýtsııalyq sot onyń ımpıchmentin bekitti.
Bul joly saılaýda jeńiske jetken úmitker daýys berý nátıjeleri resmı túrde rastalǵannan keıin birden prezıdenttik qyzmetke kirisedi.