LGBT jekemenshik mektepterde qarqyndy nasıhattalyp jatyr – Ardaq Nazarov

ASTANA. QazAqparat – Májilis depýtaty Ardaq Nazarov elimizde LGBT-ny nasıhatyn shekteý sharalaryn dereý qolǵa alý máselesin kóterdi, dep habarlaıdy QazAqparat tilshisi.

«Biz ekonomıkany retteımiz, saıasatpen aınalysamyz dep júrip, ıdeologııa máselesin esten shyǵarmaýymyz kerek. Memleket irgesiniń berik bolýy, halyqtyń baıandy ómir súrýi úshin eń aldymen, dál osy ıdeologııa salasyn retteýimiz qajet. Ony bárińiz bilesiz. Ózderińizge málim, 8 sáýirde Astanada femınıster sherýi ótti. Bul kúni turmystyq zorlyq-zombylyqqa qarsy mıtıng bolady degen. Biraq, olaı bolmady, jınalǵandar áıel teńdigin aıtýdan bastap, sońynda gomoseksýalızmdi nasıhattady. Órimdeı balalar, arasynda oqýshylar da bar, LGBT jalaýyn jamylyp júr. Jalpy, sońǵy kezde elimizdiń aqparat keńistiginde birjynystyq neke, gomoseksýalızm, jynysty aýystyrý sekildi máseleler erkin nasıhattalyp jatyr», - dedi Ardaq Nazarov Premer-Mınıstrdiń orynbasary Altaı Kólginovke saýal joldaı otyryp.

Onyń aıtýynsha, nasıhattaýshylardyń artynda Batystyń halyqaralyq uıymdary tur.

«Eń soraqysy, geı-propoganda qazir Astana men Almaty sekildi iri qalalardyń jekemenshik mektepterinde de óte qarqyndy nasıhattalyp jatyr. Muny sondaǵy oqýshylardyń áleýmettik jelidegi paraqshalarynan ashyq ańǵarýǵa bolady. Aýrý batpandap kirip, mysqyldap shyǵady deıdi atam qazaq. Ókinishke qaraı, biz sol aýrýdy qoǵamǵa juqtyryp aldyq. Bul bálkim ıdeologııanyń álsizdiginen shyǵar», - deıdi ol.

Májilis depýtatynyń málimdeýinshe, elimizde LGBT-ny nasıhattaýdy shekteýge qatysty dereý aldyn alý sharalaryn qolǵa alý qajet.

«Qazir meniń osy depýtattyq saýalym jarııalanysymen-aq óz qandastarymyz jaǵamnan alatynyn bilip otyrmyn, «toleranttyq», «tózimdilik» degen sózderdi qalqan etip, áleýmettik jelilerde qaralaıdy. Osyndaı azamattarǵa aıtarym, erteń sizdiń ulyńyz kelinniń ornyna eńgezerdeı qyztekeni úıge ertip kelse, nemese aıalap ósirgen qyzyńyz erkekshoramen «otaý quryp» jatsa, tolerantty bolyp batańyzdy beresiz be? Mundaı azǵyndyq óz otbasyńyzǵa kelse tózesiz be? LGBT ıdeologııasy qazaq halqynyń ǵasyrlar boıy qalyptasqan salt-dástúrin, ulttyq qundylyqtaryn toz-tozyn shyǵarýdy kózdeıdi dep bilemin. Al, dástúri men rýhanııatynan aırylǵan ulttyń bolashaǵy joq ekeni aıdan anyq. Ult qurysa – memleket qulaıdy», - deıdi A. Nazarov.

Sóz sońynda Ardaq Nazarov kelesi usynystardy nazarǵa alýdy surady:

- mıtıngke kelgen balalardyń ata-analarynan suraý alynsyn,

- barlyq platformalarda, sonyń ishinde áleýmettik jelilerde ulttyq mádenıetimizge sáıkes kelmeıtin fılmder men serıaldardy kórsetýge jáne nasıhattaýǵa tyıym salynsyn,

- teris aǵymdardy nasıhattaıtyn aqparat kózderinen saqtaıtyn zań normalary jasaqtalyp, Parlamentke qarastyrýǵa engizilsin,

- respýblıka kólemindegi oqý oryndarynda ulttyq qundylyqtardy, mádenıetti nasıhattaý sabaqtary oqytylsyn.