LGBT ókilderi Parlament depýtattaryna aqparattyq qysym jasady — Edil Jańbyrshın
ASTANA. KAZINFORM — Májilis depýtaty Edil Jańbyrshın LGBT qaýymdastyǵy Parlament depýtattaryna aqparattyq shabýyl uıymdastyrǵanyn málim etti.
Aıta keteıik, búgin Májilistiń jalpy otyrysynda pedofılııa men LGBT-ny nasıhattaýǵa tyıym salýǵa baǵyttalǵan zań qabyldandy.
— Bul máseleniń qyzý talqylanyp jatqanyna bes jyldyń júzi boldy. Dál osy minberden ózim de, áriptesterim de birneshe ret depýtattyq saýal joldap, máseleni búge-shigesine deıin talqyladyq. Olar qasıetti kıiz úıimizde taırańdap, ulttyq qundylyqtarymyzdy aıaqqa taptady. Ulttyq folklorymyzda gomoseksýalızm bar dep, tutas halyqqa jala japty. Ekinshiden, tipti mektepterge baryp, ashyq ári zańsyz propaganda júrgizdi. Úshinshiden, Edil Jańbyrshın, Ashat Aımaǵambetov, Janarbek Áshimjan, Ardaq Nazarov, Elnur Beısenbaev pen Samat Musabaevqa aqparattyq shabýyl jasady. Bizdiń jeke basymyzǵa ótip, kelemejdedi. Sol úshin arnaıy kontent ázirlenip, taratyldy. Bul baryp turǵan bassyzdyq, zań shyǵarýshy organnyń ókilderine qysym jasaý, adam quqyǵyn taptaý, — dedi Edil Jańbyrshın Májilistiń jalpy otyrysynda.
Onyń aıtýynsha, qazirge deıin ulttyq qundylyqtardy joıýǵa baǵyttalǵan ásire femınıstik, LGBT qaýymdastyǵy arnaıy ári josparly túrde shetelden mıllıondaǵan dollarmen qarjylandyrylyp jatyr.
— Árıne, buǵan qarsy qoǵam únsiz qalǵan joq. Byltyr qoǵam belsendileri E-petition.kz memlekettik platformasynda LGBT nasıhatyna qarsy petıtsııa jarııalap, ol az ýaqyt ishinde zańdy túrde 50 myń qol jınaldy. Bul — LGBT-niń elimizge qajetsiz ári jat qubylys ekendiginiń, oǵan halyqtyń ashyq qarsylyǵynyń anyq kórinisi. Osy boıynsha arnaıy zertteý uıymdastyrylyp, onyń nátıjesinde LGBT propagandasy jas órenderimizdiń psıhıkasyna tikeleı teris áser etetini, olardyń tanymyn syndyratyn qaýipti úrdis ekeni anyqtaldy. Buǵan qosa, halyqaralyq balalar quqyǵyna qatysty standarttar da osyǵan uqsas talaptardy qamtıdy. BUU-nyń Bala quqyqtary týraly konventsııasynda memleketterge balanyń rýhanı, psıhıkalyq jáne fızıkalyq jaǵdaıyna zııan keltiretin aqparat pen materıaldardan qorǵaý jóninde naqty sharalar qabyldaý mindeti júktelgen. Sondaı-aq, 2022 jyly Qazaqstan Jeneva deklaratsııasyna qosylyp, onda árbir derbes memleket ózderiniń negizgi qundylyqtaryn, dástúrli otbasy ınstıtýtyn saqtaý boıynsha ulttyq saıasatyn júrgizýge quqyly ekeni aıtylǵan, — dedi depýtat.
Osy oraıda ol Qazaqstanda LGBT-ny nasıhattaýdy zańmen shekteý boıynsha qabyldap jatqan normalar keıbir halyqaralyq uıymdar men belsendiler aıtyp júrgendeı eshqandaı adam quqyǵyn shekteýge baǵyttalmaǵanyn atap ótti.
— Kerisinshe, bul normalar dástúrli otbasylyq ınstıtýtty buzýdan jáne balalar men jasóspirimderdi destrýktıvti ıdeologııalardan qorǵap, ulttyq qaýipsizdigimizdi saqtaýǵa, halqymyzdyń rýhanı ımmýnıtetin nyǵaıtýǵa septigin tıgizedi. Derbes memlekettiń ishki isine aralasýǵa, eń bastysy onyń ulttyq zańdaryna qysym kórsetýge eshqandaı uıymnyń quqyǵy joq, — dedi Edil Jańbyrshın.