LGBT-ny nasıhattaýǵa tolyqtaı tyıym salý kerek - Rınat Zaıytov

ASTANA. KAZINFORM – Májilis depýtaty Rınat Zaıytov femınıta qaýymdastyǵyna Qazaqstan Respýblıkasynyń aýmaǵynda shekteý qoıý kerek ekenin málim etti.

«Búgingi joldanatyn saýal – shegine jetken shydamnyń, taptalýdan tózimi taýsylǵan namystyń aşy daýysy dep túsinińizder. Qazaqstan memleketi táýelsizdik alǵaly esiginen doc ta, dushpan da erkin kire bastady. Ol jasyryn emes. Dospen tabysyp, baýyrymyz bútindeldi dep qýanǵanymyzben, aram pıǵyldaryn iske asyrýǵa kelgen dushpandar janymyzdy aýyrtyp, júregimizdi julýǵa sál qalyp tur. Solardyń biregeıi qazaq jastaryn azǵyndatyp, bolashaǵymyzdyń tamyryna balta shapqysy keletin álemdik deńgeıdegi jaýyz uıym – LGBT men femınıta qaýymdastyǵy. Az ǵana ýaqytta jastarymyzdy azǵyndyqqa jetektegen jeksuryn uıymdar búginde memlekettiń áreketsizdiginen ábden basqa shaýyp, tóske órledi... Osydan keıin esh jazaǵa tartylmasyna kózi jetken azǵyndar kúni keshe Almatyda Quryltaı ótkizetinin ashyq habarlady. Álmısaqtan el men jerdiń, ulys pen ulttyń taǵdyry talqylanatyn quryltaı degen qasterli uǵymdy osynsha tómendetkende biz nege qarap qalýymyz kerek?! Memleket basshysynyń ózi úılestirgen elimizdiń Ulttyq Quryltaıynyń mańyzy men maǵynasyna nuqsan keltiretin bul femınıta azǵyndaryna nege toqtaý joq?!», - dedi R. Zaıytov Premer-Mınıstr Oljas Bektenov pen Bas prokýror Berik Asylovtyń atyna joldaǵan saýalynda.

Osy oraıda depýtat olardyń artynda kim turǵanyn, olarǵa qarjy bóletin kimder ekenin jáne olardyń kózdegen túp maqsaty nede jatqanyn anyqtaýdy surady.

«Quqyq qorǵaý organdary LGBT uıymyna kelgende «tártipti qaýqarsyz» bola qala ma? Joǵaryda aıtylǵandardy eskere otyryp, sizden (Bas prokýrar B. Asylov) Qazaqstan Respýblıkasynyń 2005 jylǵy 18 aqpandaǵy «Ekstremızmge qarsy is-qımyl týraly» № 31 Zańynyń 1-babyna sáıkes, femınıta qaýymdastyǵyna Qazaqstan Respýblıkasynyń aýmaǵynda shekteý qoıýdy jáne LGBT-ny nasıhattaýǵa tolyqtaı tyıym salýlaryńyzdy talap etemiz», - dedi depýtat.

Budan buryn habarlanǵandaı, bıyl maýsym aıynyń basynda E-Petition.kz» resmı portalynda «Biz QR-daǵy LGBT-ny ashyq jáne jasyryn nasıhattaýǵa qarsymyz» petıtsııasy resmı qaralýy úshin qajetti qol jınady.

Bıyl kóktemde AMANAT partııasy Májilistegi fraktsııasynyń depýtattary Janarbek Áshimjan men Ashat Aımaǵambetov «Mass-medıa týraly» zańǵa LGBT ókilderi týraly BAQ-ta jazýǵa tyıym salatyn túzetýler usyndy.