LGBT-ny nasıhattaýǵa tyıym salý Qazaqstannyń halyqaralyq mindettemelerine qaıshy kelmeı me
ASTANA. KAZINFORM - LGBT-ny nasıhattaýǵa tyıym salý Qazaqstannyń halyqaralyq mindettemelerine qaıshy kelmeı me? Bul saýalǵa búgin Senattyń jalpy otyrysynda Ádilet vıtse-mınıstri Botagóz Jaqselekova jaýap berdi.
Otyrys barysynda senator Sergeı Ershov dástúrli emes jynystyq qatynasty nashıttaýǵa tyıym salýǵa qatysty qoǵamda qyzý pikirtalas júrip jatqanyn aıtty.
— Palataǵa azamattardan da, ártúrli úkimettik emes uıymdardan, onyń ishinde halyqaralyq uıymdardan da ótinishter kelip túsip jatyr. Ol ótinishterde qarastyrylyp otyrǵan norma Qazaqstan qabyldaǵan adam quqyqtary salasyndaǵy halyqaralyq mindettemelerge qaıshy keledi degen ustanym aıtylǵan. Osyǵan baılanysty ýákiletti organdardan suraqtaryma jaýap berýin suraımyn. Mádenıet jáne aqparat mınıstrligine: sizderdiń taraptan ÚEU-lermen, onyń ishinde halyqaralyq uıymdarmen atalǵan normanyń maqsattary men mindetteri jan-jaqty túsindiriletin túsindirý jumystary nemese kezdesýler ótkizildi me? Sondaı-aq bul zań qabyldanǵannan keıin qandaı túsindirý jumystary júrgiziledi? Al Ádilet mınıstrliginen osy normanyń Qazaqstan ratıfıkatsııalaǵan adam quqyqtary salasyndaǵy halyqaralyq sharttarǵa sáıkes kelmeıdi degen jekelegen pikirlerge quqyqtyq baǵa berýdi suraımyn, — dedi depýtat.
Mádenıet jáne aqparat vıtse-mınıstri Evgenıı Kochetovtiń aıtýynsha, túzetýlerdi talqylaý barysynda barlyq kezeńde adam quqyqtarynyń irgeli qaǵıdattary, sondaı-aq Konstıtýtsııa men eldiń halyqaralyq mindettemelerine sáıkestigi saqtalǵan.
Onyń atap ótýinshe, 2024 jyldyń maýsym aıynan, petıtsııa portalda talqylana bastaǵan sátten-aq jumysqa salalyq ÚEU-lermen quqyq qorǵaý uıymdary tartylǵan. Otyrystar ashyq ári transparentti formatta ótken.
— Odan keıin túrli alańdarda kezdesýler ótkizdik. Atap aıtqanda, maýsym aıynda BUU-nyń Eýropalyq keńsesinde ámbebap merzimdi esepti qorǵaý barysynda osy zań normalary sarapshylarǵa túsindirildi. Sonymen qatar Ádilet mınıstrliginiń janynda EO-men birlesken jumys toby bar. Sol alańda da bul normalardy áriptesterimizben talqyladyq. Budan bólek, Azamattyq forým barysynda ártúrli mınıstrlikter bazasynda, onyń ishinde Ádilet mınıstrligimen de arnaıy alańdar uıymdastyrylyp, ÚEU-lermen kezdesip, osy máseleni talqyladyq. ıAǵnı bul normalardy túsindirýde kemshilik bolǵan joq. Al bolashaqqa kelsek, eger bul normalar Senatta maquldansa, olardy ashyq talqylaýǵa qajettilik bar ekenin qazirdiń ózinde kórip otyrmyz. Óıtkeni quqyq qoldanýǵa qatysty birqatar suraqtar bar. Barlyq talqylaý barynsha ashyq ótetinine sendirgim keledi, — dedi Evgenıı Kochetov.
Al Ádilet vıtse-mınıstri Botagóz Jaqselekova Qazaqstannyń birqatar halyqaralyq sharttarǵa, onyń ishinde pikir bildirý erkindigine belgili bir shekteý qoıýǵa jol beretin Azamattyq jáne saıası quqyqtar týraly halyqaralyq paktke qatysýshy ekenin málim etti.
— Biraq bul atalǵan paktiniń 19-babynyń 3-tarmaǵynda kózdelgen. Alaıda mundaı shekteýler mindetti túrde zańmen bekitilýi jáne memlekettik qaýipsizdik, qoǵamdyq tártip, adamgershilik pen densaýlyqty qorǵaý múddelerinen týyndaýy tıis. LGBT-ǵa tıesililik máselesine qatysty aıtar bolsam, bul Qazaqstan zańnamasy boıynsha da, halyqaralyq zańnama boıynsha da quqyq buzýshylyq bolyp sanalmaıdy. Ol úshin jaýapkershilik belgilemeımiz. Bul tek LGBT-ny jarııa túrde nasıhattaýǵa qatysty. Qorytyndylaı kele, bul norma Qazaqstan ratıfıkatsııalaǵan halyqaralyq sharttarǵa sáıkes keledi, — dep túıindedi vıtse-mınıstr.
Aıta keteıik, búgin Senattyń jalpy otyrysynda óskeleń urpaqty dástúrli emes jynystyq qatynastardy nasıhattaýdan qorǵaıtyn Zań birinshi oqylymda maquldandy.
Buǵan deıin Mádenıet jáne aqparat mınıstrligi LGBT-ny nasıhattaýǵa tyıym salatyn zań normasyna qatysty pikir bildirgen edi.