LGBT-ny nasıhattaǵandarǵa qandaı jaza qoldanylady – depýtat jaýaby

ASTANA. KAZINFORM — LGBT-ny nasıhattaǵandarǵa ákimshilik jaza qoldanylady. Bul týraly áleýmettik jelidegi tikeleı efırde Májilis depýtaty Edil Jańbyrshın málim etti.

- Birinshiden, LGBT ókilderine, olardyń osy qoǵamda ómir súrýine Qazaqstan zańy tyıym salmaıdy. Eshkimdi túrmege jappaıdy, aıyppul salmaıdy, ıaǵnı ol - árkimniń jeke tańdaýy. Biraq, sonyń ókili retinde qoǵamda nasıhat júrgizip, ártúrli semınar men kýrstar, aktsııalar, mıtıngiler ótkizip, áleýmettik jeli men BAQ-ta sonyń sımvolıkalary jáne LGBT nasıhattalsa, buǵan zańmen tyıym salynady.

Taǵy bir másele – janama jarnamalar bar. Arnaıy oıynshyqtardy daıyndaıtyn, kınolar men mýltfılmderdi, derekti fılmderdi túsiretin, sondaı-aq sımvoldardy paıdalaný sekildi ózderiniń is-áreketterin jarnamalaıtyn toptar bar. Endi, buǵan tyıym salyndy. Qaıtalap aıtamyn, LGBT-nyń jeke ókiliniń qara basyna qatysty bizde zańmen tyıym joq. Biraq, óziniń is-áreketin jarnamalasa, buǵan tyıym bar, - dedi E. Jańbyrshın. 

Onyń paıymynsha, bul nasıhattardyń barlyǵy jastarǵa, balalarǵa baǵyttalǵan. 

- Sonymen qatar, osy rette demografııalyq problema bolýy múmkin. Bul jaǵdaı rýhanı, demografııalyq jáne ekonomıkalyq irgetasymyzǵa qaǵylyp jatqan syna. Sondyqtan elimizdi osydan qorǵaýymyz kerek... Osy talaptardy elemegender bolsa, ákimshilik jaza qarastyrylǵan, ıaǵnı aıyppul salynady. Eger, osy jaǵdaı qaıtalansa, 10 kúnge deıin qamaýǵa alynady, - dedi depýtat. 

Eske salsaq, jaqynda Parlament Májilisi pedofılııa men LGBT-ny nasıhattaýǵa tyıym salýǵa baǵyttalǵan zańdy qabyldandy.