LGBT nasıhattyń 73 paıyzy áleýmettik jeliden tarap jatyr — Edil Jańbyrshın
ASTANA. KAZINFORM — Májilis depýtaty Edil Jańbyrshın LGBT nasıhat qoǵamǵa, onyń ishinde jas býynǵa keri áser etedi dep esepteıdi.
— Byltyr LGBT nasıhatyna qarsy petıtsııaǵa az ýaqyttyń ishinde 50 myńnan astam adam qol qoıdy. Komıssııa otyrysynda biraz másele kóterilip, dıskýssııa boldy, onda barlyq tarap qatysty. Sol jerde Májilis depýtattary LGBT-ny nasıhattaýǵa tyıym salý jóninde usynys jasadyq, birneshe ret depýtattyq saýal joldandy. Byltyr komıssııa otyrysynyń qorytyndysy boıynsha osy baǵytty zertteý jóninde sheshim qabyldandy. Bir jyl boıy sarapshylar, úkimettik emes uıymdar, qor ókilderi zertteý júrgizip búgin sonyń qorytyndysyn ortaǵa salyp otyr. Ózderińiz kórip otyrǵandaı, úsh aspektini ataǵan jón. Birinshiden, nasıhat balalar men jasóspirimderge qalaı áser etedi? Tolyq qalyptaspaǵan jasóspirimniń psıhologııasyna, emotsııasyna, ishki mazasyzdyq pen tolǵanysyna LGBT nasıhattyń keri áser etetini anyqtaldy, — dedi Edil Jańbyrshın BAQ ókilderiniń saýalyna jaýap bere turyp.
Sondaı-aq halyq qalaýlysy LGBT nasıhattyń qaıda júrip jatqanyn sóz etti.
— Aqparattyń 73% áleýmettik jelilerdegi kontentten alady eken, ıaǵnı áleýmettik jeli nasıhatqa jol ashyp otyr. Ekinshi orynda buqaralyq aqparat quraldarynda 1550 materıal shyqqan, bul óte kóp. Buny aqparattyq shabýyl dep aıtýǵa bolady. Úshinshi jaıt, byltyr komıssııa otyrysynda bul adamnyń quqyǵy degen másele aıtyldy. Jeneva konventsııasynyń otbasylyq qundylyq, áıelderdiń densaýlyǵyna qatysty deklaratsııasy bar. AQSh sol qujatqa súıenip, LGBT-ǵa tyıym salý jóninde zań qabyldady. Adamdardyń quqyǵy qorǵalýy kerek, nege biz kópshiliktiń emes azshylyqtyń quqyǵyn qorǵaýymyz kerek? Taǵy bir jaıt, bul óte jeke másele, ony jarııaǵa jar salýdyń qajeti joq, — deıdi ol.
Onyń aıtýynsha, zertteý nátıjesi boıynsha negiz paıda boldy.
— Zańdy qabyldaý kezinde bul norma kerek pe, kerek emes pe dáleldeýimiz kerek. Bul normanyń qandaı áleýmettik-saıası mańyzy bar? Búgin zertteý nátıjesin kórip otyrmyz, LGBT nasıhat qoǵamǵa, onyń ishinde jastarǵa keri áser etedi. Bizdiń rýhanı birligimizge, memlekettik qaýipsizdigimizge qaýipti dep esepteımiz. Demografııalyq ósimge de keri áser etýi múmkin. Biz balalar men jasóspirimderdi LGBT nasıhatynan qorǵaýymyz kerek, — dep túsindirdi depýtat.
Aıta keteıik, búgin elordada LGBT nasıhattyń balalar men jasóspirimderge áserin zertteý nátıjesi talqylandy. Atalǵan sharaǵa sarapshylar, ǵalymdar, memlekettik organdar ókilderi, depýtattar men qoǵamdyq uıymdar ókilderi qatysty.
Buǵan deıin Qazaqstanda LGBT nasıhatqa qylmystyq jaýapkershilik engizý usynysy týraly jazǵan edik.
Aıta ketsek, Prezıdent Qasym-Jomart Toqaev Ulttyq quryltaıdyń ІV otyrysynda LGBT-ǵa qatysty paıym aıtty.
Májilis depýtaty Edil Jańbyrshın buǵan deıin LGBT ókilderin jazalaý máselesin kótergen edi.
Eske salaıyq, byltyr 1 tamyzda «Qazaqstan Respýblıkasynda LGBT-ny ashyq jáne jasyryn túrde nasıhattaýǵa qarsymyz!» petıtsııasy boıynsha sheshim jobasyna jarııa talqylaý ótti.