Leıla Álıeva Ázerbaıjanda Qazaqstannyń ádebıet jáne mádenıet ortalyǵyn ashty

BAKÝ. QazAqparat – VI Baký halyqaralyq kitap kórme-jármeńkesi aıasynda Ázerbaıjannyń M.F.Ahýndov atyndaǵy Ulttyq kitaphanasynda Qazaqstan ádebıet jáne mádenıet ortalyǵy ashyldy, dep habarlaıdy QazAqparat tilshisi.

Halyqaralyq jobanyń maqsaty - Qazaqstan halqynyń tarıhy men mádenıeti, salt-dástúrleri, ekonomıka, saıasat, áleýmettik saladaǵy jetistikteri, klassıkalyq jáne qazirgi zamanǵy proza men poezııanyń ádebı qory jaıly bilim taratý.

Ortalyqtyń ashylý saltanatyna G.Álıev atyndaǵy qordyń vıtse-prezıdenti Leıla Álıeva, Ázerbaıjannyń Mádenıet mınıstri Abýlfas Garaev, TÚRKSOI-dyń bas hatshysy Dúısen Qaseınov, Qazaqstannyń Ázerbaıjandaǵy ýaqytsha senimdi ókili Darhan Kósherbaev, M. Ahýndov atyndaǵy Ulttyq kitaphananyń dırektory Kerim Tahırov, Qazaqstan Ulttyq akademııalyq kitaphanasy basshysynyń orynbasary Álııa Qojabekova, Ázerbaıjanda tirkelgen dıplomatııalyq mıssııalardyń ókilderi, sheteldik kitaphanalardyń basshylary, mádenıet qaıratkerleri men BAQ ókilderi qatysty.

Ortalyqta Elbasy Nursultan Nazarbaevtyń qyzmeti, onyń halyqaralyq saıası arenadaǵy róli týraly kitaptary, sonymen qatar belgili qazaqstandyq avtorlardyń qazaq, orys jáne aǵylshyn tilderindegi jumystary qoıyldy. Kitaphanaǵa barlyǵy 200-den astam kitap syıǵa tartyldy. Bul kitaptar oqyrmandardyń qyzyǵýshylyǵyn arttyryp, qazaq halqynyń mádenı qundylyqtarymen jaqynyraq tanysýǵa múmkindik beredi.

Aıta keterligi, 2016 jyldan bastap QR Mádenıet jáne sport mınıstrliginiń qoldaýymen Nur-Sultandaǵy QR Ulttyq akademııalyq kitaphanasy QR Syrtqy ister mınıstrligi men elshilikterimen birlesip, shet elderdiń ulttyq jáne basqa da iri kitaphanalarynda qazaq ádebıeti men mádenıeti ortalyqtaryn ashý jónindegi halyqaralyq jobany júzege asyryp keledi.

Búgingi tańda qazaq ádebıeti men mádenıeti ortalyqtary álemniń 32 kitaphanasynda ashylǵan. ıAǵnı, Ońtústik Koreıa, Qyrǵyz Respýblıkasy, Fınlıandııa, Vengrııa, Reseı, Armenııa, Malaızııa, Túrkııa, Qytaı, Grýzııa, Frantsııa, Japonııa, Shvetsııa, Makedonııa, Bolgarııa, Chehııa, Italııa, AQSh (Kongress kitaphanasy jáne Nıý-Iork kópshilik kitaphanasy), Rýmynııa, Iran, Brazılııa, Ýdmýrtııa, Germanııa jáne taǵy basqa elderde qazaq ádebıeti men mádenıeti ortalyqtary jumys istep tur.