Leıkoplastyr ornyna skotch: Aqtóbe oblysynyń Densaýlyq basqarmasy túsinik berdi

AQTÓBE. QazAqparat – Onkologııalyq aýrýǵa dýshar bolǵan aqtóbelik qan synamasyn tapsyrý kezinde ózine leıkoplastyr ornyna skotch japsyrǵan dárigerlerge renishin bildirdi. Oblystyq Densaýlyq saqtaý basqarmasynyń málimetine súıensek, qazir synama alý kóbeıgen, sol sebepti atalǵan medıtsınalyq qural taýsylǵan, dep habarlaıdy QazAqparat tilshisi.

Aqtóbedegi áleýmettik jelilerdiń birinde óńir turǵyny óz shaǵymyn bildirdi.

«Men onkologııalyq esepte turmyn. Analız tapsyrǵan soń ıne izi qalǵan orynǵa leıkoplastyr japsyrýy tıis. Biraq bólim men emhanada leıkoplastyr joq. Onyń ornyna kádimgi skotch basyp berdi. Al biz onkologııalyq dertke shaldyqqandarǵa mıllıondaǵan qarjy bólinetinin bilemiz», - dep jazylǵan shaǵymda.

Keıin Aqtóbe oblystyq Densaýlyq saqtaý basqarmasy osy oqıǵaǵa qatysty tekserý júrgizdi. Sebebin de anyqtady.

«M. Ospanov atyndaǵy Batys Qazaqstan medıtsına ýnıversıteti janyndaǵy Medıtsınalyq ortalyq ákimshiliginiń habarlaýynsha, naýryz aıynda onkologııalyq dertke shaldyqqandardyń jaǵdaıyn bilý maqsatynda keń kólemde qaıta tekserý jumysy júrgizilgen. Sondyqtan synama alý sany artqan. 30 naýryz kúni keıbir medıtsınalyq qural, atap aıtqanda leıkoplastyr taýsylyp qalǵan. Quralǵa qosymsha suranys berildi. Resmı jetkizýshi qajetti zatty úsh kúnde jetkizip berýge kelisken», - dep habarlady oblystyq Densaýlyq saqtaý basqarmasynan.

FOTO: áleýmettik jeli https://www.instagram.com/p/CqkTdv5oG70/?igshid=MDJmNzVkMjY=