Levıtke ese jibergen Aıbek: Fınaldaǵy jeńilis qamshylaıdy

NUR-SULTAN. QazAqparat - Elordada ótken bokstan Prezıdent kýbogy dodasy eresekter qataryna endi ótken jas sportshylarǵa úlken tájirıbe syılady, dep jazady olympic.kz.

Óıtkeni bul týrnırde jastar quramasynan qanattanǵan Talǵat Shaıken, Damır Toıbaı, Aıbek jáne Nurbek Oralbaılar baq synady.

Іri halyqaralyq týrnırdiń fınalyna deıin súrinbeı, Olımpıada júldegeri Vasılıı Levıtke ese jibergen Aıbek Oralbaı jarystan alǵan áserimen bólisti.

«Prezıdent kýbogyna jaqsy daıyndyqpen keldik. Ulttyq qurama sapynda úzilissiz jattyǵý jasap, óz myqtylyǵymyzdy dáleldeýge tyrystyq. Osy aralyqta bizdi baqylaýda ustap, baǵyt kórsetken bapkerlerimizge rahmet. Al týrnırge keler bolsam, úsh kezdesý ótkizip, fınalda jeńilip qaldym. Birinshi jáne ekinshi jekpe-jekte Ózbekstan men Qytaı sportshylarynan basym túsken edim. Aqtyq aıqasta Vasılıı Levıtke ese jiberdim. Sóz joq, fınalda maǵan tájirıbe jetpeı qaldy. Bul jeńilis meniń alǵa basýyma serpin beredi. Endi eke ese artyq eńbektenip, eki ese artyq jattyǵamyn. Fınaldaǵy jeńilis aldaǵy maqsattaryma jetý úshin úlken qamshy bolary anyq. Budan soń iri jeńister kútedi», - deıdi Aıbek.