Levıt pen Tışenko qarymta aıqas ótkizýi múmkin
ASTANA. QazAqparat - 25 tamyz ben 3 qyrkúıek arasynda Gambýrgte ótetin bokstan álem chempıonatyna Eýropa chempıony Evgenıı Tışenkonyń qatysatyny belgili boldy. Bul týraly Reseı quramasynyń bas bapkeri Oleg Menshıkov málimdedi, dep habarlaıdy SSports.kz.
Rıodaǵy Olımpıada fınalyndaǵy Tışenko men qazaqstandyq Vasılıı Levıt arasyndaǵy atyshýly aıqastan soń qos boksshy alǵash ret qarymta jekpe-jek ótkizýi múmkin.
Levıttiń mundaı jekpe-jek bolǵan jaǵdaıda óz taktıkasyna ózgerister engizetini týraly Qazaqstan quramasynyń bas bapkeri Myrzaǵalı Aıtjanov aıtyp berdi.
«Árıne, ózgerister engizip, aıqyn jeńiske jetý kerek. Ol úshin qazir Levıt pen Tışenko arasynda bolýy yqtımal aıqas boıynsha jumystar júrgizilýde. Vasılıı bárin jaqsy túsinedi jáne qazir reseılikpen bolýy múmkin jekpe-jekke daıyndalyp jatyr», - dedi Aıtjanov.
