Levıt, Eleýsinov jáne Emberdi balalar úıine kómek kórsetti
ASTANA. KAZINFORM – «Taza Qazaqstan: Astana – tazalyq pen tártiptiń úlgisi» aýqymdy ekologııalyq aktsııasy aıasynda Astana qalasynyń Dene shynyqtyrý jáne sport basqarmasynyń basshysy Vasılıı Levıt jáne elimizge tanymal kásipqoı boksshy, Rıo Olımpıadasynyń chempıony Danııar Eleýsinov, aýyr atletıkadan Álem chempıony Edige Emberdi «Ónegeli urpaq» aptalyǵyn ótkizdi.
Astana qalalyq sport basqarmasynan atap ótkendeı, «Ónegeli urpaq» aptalyǵy aıasynda Astana mańyndaǵy «Svetoch» balalar úıiniń janyndaǵy orta mektepte senbilik uıymdastyrdy. Olar aldymen aýla ishindegi qoqystardy tazalap, esik aldyn sypyryp, ósip ketken shópterdi shaýyp, gúlderdiń túbin qopsytty.
«Taza Qazaqstan» aýqymdy ekologııalyq aktsııanyń 4 aptasy «Ónegeli urpaq» uranymen ótýde. Elorda boıynsha qala turǵyndary ardagerlerdiń, balalar men qarttar úıleriniń aýlalaryn tazalap, abattandyrýda. Aıtýly ekologııalyq aktsııaǵa bizde óz úlesimizdi qosýǵa tyrysyp jatyrmyz. Áriptesterimmen aqyldasa kele Astana mańynda ornalasqan «Svetoch» balalar úıine keldik. Bul balalar úıinde qazirgi tańda 19 bala tárbıelenýde eken. Osy aktsııa barysynda ózim basqaryp otyrǵan qalalyq sport basqarmasyna qarasty Sporttyq-buqaralyq is-sharalardy ótkizý dırektsııasynyń qyzmetkerlerimen, elimizge tanymal birqatar sportshymen birge balalar úıiniń aýmaǵyn qoqystan tazalap, tárbıelenýshiler úshin shaǵyn mereke uıymdastyrdyq. Biz balalardy tárbıeleý men damytýǵa únemi óz úlesimizdi qosýǵa tyrysamyz. Ózderińiz biletindeı, sport – bala tárbıesindegi eń jaqsy kómekshi. Búginde elordada túrli sektsııalarda 500 myńnan astam bala aınalysady. Olar ózderiniń fızıkalyq jaǵdaıyn jaqsartyp qana qoımaıdy, sonymen qatar meıirimdilik, jaýaptylyq jáne janashyrlyq sııaqty qasıetterdi tárbıeleıdi. Óz áriptesterime, sportshylaryma jáne sporttyq-buqaralyq is-sharalardy ótkizý dırektsııasynyń qyzmetkerlerine kórsetken kómegi men qoldaýy úshin alǵys aıtamyn. Bul naýqan osymen toqtap qalmaıdy. Ári qaraı jalǵasyn tabady» - dedi Astana qalasynyń Dene shynyqtyrý jáne sport basqarmasynyń basshysy Vasılıı Levıt.
Aıta keteıik, «Svetoch» balalar úıi janyndaǵy orta mektep óz jumysyn 1999 jyly qarashada Lılııa Venıamınova Solovevanyń úsh bólmeli páterinde bastalǵan eken. Búgin de balalar úıiniń tárbıelenýshileri aýdandyq olımpıadalarǵa, konkýrstar men jarystarǵa belsendi qatysyp, qurmetti oryndarǵa ıe bolyp júr. Sondaı-aq, fýtboldan, voleıboldan sporttyq jarystarǵa, shaqyrylǵan mektepterdiń tárbıelenýshileri men oqýshylary arasyndaǵy estafetalarǵa qatysady deıdi mekeme basshylyǵy.
«Meniń oıymsha, bul naýqan jaqynyńa kómektesý men qoldaýdyń tamasha úlgisi. Biz janymyzdaǵy qarııalarǵa kómekteskende, osyndaı qıyn jaǵdaıǵa tap bolǵan balalarǵa qol ushyn sozyp, mereke uıymdastyrý olar úshin ǵana emes, ózimiz úshin de mańyzdy nárse jasaımyz. Júregimizde jylýlyq uıa salady. Biz osyndaı azǵantaı ǵana jumysymyz arqyly olardyń kóńilin kóterdik degen úmittemiz. Balalardyń kózderindegi qýanysh biz úshin eń jaqsy Alǵys boldy»- deıdi Rıo Olımpıadasynyń chempıony Danııar Eleýsinov.
Astana tórinde birneshe kún qatarynan ótip jatqan aktsııanyń maqsaty – qalanyń jeke sektorynda turatyn jalǵyzbasty zeınetkerler men erekshe qajettiligi bar qart adamdardyń aýla aýmaqtaryn tazalaýǵa jáne kórkeıtýge kómek kórsetý.
Esterińizge sala keteıik, 6 sáýir men 11 mamyr aralyǵynda Astanada «Taza Qazaqstan: Astana – tazalyq pen tártiptiń úlgisi» aýqymdy ekologııalyq aktsııasy ótip jatyr. Onyń aıasynda 29 sáýir men 4 mamyr aralyǵynda bastalǵan «Ónegeli urpaq» taqyryptyq aptalyǵy qarqyndy ótýde.
«Ónegeli urpaq» aptalyǵy – qarttar úıi, ardagerler, jumys barysynda qaza tapqan quqyq qorǵaý organdary qyzmetkerleriniń otbasy turatyn úıler aýmaǵyn abattandyrýǵa baǵyttalǵan. Aıtýly aktsııaǵa óz úlesin qalanyń árbir turǵyny qosa alady.
