Іlespe júk qujattaryn bir kólikke ǵana rásimdeý qajet pe

ASTANA. KAZINFORM — Shekara arqyly kiretin nemese eksportqa shyǵatyn aýyr jáne kólemi úlken jabdyqtarǵa ilespe júk qujattaryn rásimdeý tártibin QR QM Memlekettik kirister komıtetiniń ókili Baıdos Baıbozın tikeleı efır barysynda túsindirdi.

Baıdos Baıbozınnyń sózinshe, keıbir salyq tóleýshiler bir taýarǵa ilespe júk qujattaryn birneshe kólikke jasap keletin jaǵdaı kezdesedi. 

— Bul durys emes jáne zań boıynsha jol berilmeıdi. Árbir kólikke jeke ilespe qujat rásimdelýi tıis. Óıtkeni ár kólik jeke baqylaýdan ótedi. Sonymen qatar bul salyq eseptiligi men býhgalterlik esep júrgizýge de yńǵaıly, — dedi spıker.

Ol óz sózinde syrty ekonomıkalyq qatysýshylar taýarlarǵa ilespe júk qujattaryn ýaqytynda usynbaý nemese qatelikter bolýy (kólemi, baǵasy durys kórsetilmeý) QR Ákimshilik quqyq buzýshylyq kodeksine sáıkes aıyppul salynýyna ákep soǵady.

— Aıyppul kólemi qatysýshylardyń deńgeıine baılanysty 5 aılyq kórsetkishten bastap 100 aılyq kórsetkishke deıin bolýy múmkin. Jyl ishinde qaıtalanǵan quqyq buzýshylyqtar da eskeriletin bolady, — dedi ol.

Sonymen qatar spıkerdiń aıtýynsha, Eýrazııalyq ekonomıkalyq odaqqa múshe elderden ákelingen taýarlar Qazaqstanǵa ilespe qujattarmen ákelingen jáne qujat mártebesi rásimdelgen bolsa, ony keri qaıtarýǵa jol berilmeıdi. Degenmen qatelikter týyndaǵan jaǵdaıda qosymsha ózgerister engizýge bolady. Sondaı -aq taýar kólik arqyly ákelingen bolsa, ózgeristerdi 20 jumys kúni ishinde jasaýǵa bolady. Basqa joldarmen ákelingen taýarlarǵa bul merzim 10 jumys kúni.

Eske sala keteıik, veterınarlyq ilespe qujattary joq 60 iri qara maldy el aýmaǵyna kirgizýge tyıym salyndy.

Aıta keteıik, 2023 jyldyń 1 sáýirinen EAEO elderi taýarǵa ilespe júkqujat rásimdeýge mindettelgen edi.