Lepsi aýylynyń turǵyndary kireberisin óz kúshimen jańartty

TALDYQORǴAN. QazAqparat - Almaty oblysy Sarqan aýdanyna qarasty Lepsi aýylynyń turǵyndary eldi mekenge kireberis arka turǵyzdy. Osylaısha aýyldaǵy aǵaıyn Elbasy Nursultan Nazarbaevtyń «Rýhanı jańǵyrý» baǵdarlamasyna óz úlesin qosty, dep habarlaıdy QazAqparat tilshisi.

Lepsi aýyly buryn Bórlitóbe aýdanynyń ortalyǵy bolǵan. Aýdan taraǵannan keıin eldi mekenniń eńsesi túsip, qańyraǵan ǵımarattar kóbeıip, halyq qalaǵa qaraı kóshe bastaǵan bolatyn. Biraq keıingi jyldary aýyl turǵyndary aýyzbirlik tanytyp, jastar Lepsiniń jańarýyna kúsh sala bastady. Oraza aıynyń alǵashqy kúnderinde jańa kireberistiń tusaýy kesilip, arka aýyldyń jańa qaqpasyna aınaldy. Lepsi aýylynyń turǵyndary men aýyl túlekteri ortaq qor quryp, jumysty eki-úsh aıdyń ishinde óz kúshimen bitirdi.

«Jańa kireberiske shamamen 3 mln teńgeden astam qarjy jumsaldy», deıdi ıgi istiń basy-qasynda júrgen aýyl turǵyny Rýslan Sáttibekov.

Іsker azamat bul arkany kóterýde ózine birneshe maqsat qoıǵanyn aıtady. Birinshiden, týǵan jer, týǵan aýylyna alǵys aıtý. Ekinshiden, aýyldyń ajaryn ashýǵa úles qosý. Úshinshiden, jastarǵa patrıottyq tárbıe berip, aýyldan ósip shyqqan azamattardyń týǵan jerge degen mahabbatyn oıatý.

Aıta ketý kerek, Balqash kóline kelýshi týrıster osy Lepsi aýyly arqyly qatynaıdy. Sondyqtan, bul kireberis - tek aýyldyń ǵana emes, Jetisý óńiriniń bedeli. Lepsi aýylynyń uıymshyl turǵyndary endi aýyl stadıonyn salýdy josparlap otyr.

Esterińizge sala ketsek, dál osy azamattar byltyr Muqan Tólebaev pen Lepsi aýylynyń arasyndaǵy joldy óz kúshimen jóndegen bolatyn.