Leonıd Mlechın qańtar oqıǵasy jaıly kitaby týraly: Toqaev oqıdy dep úmittenemin

ASTANA. QazAqparat – Reseı qalamgeri Leonıd Mlechın qańtar oqıǵasyna qatysty Qazaqstan Prezıdenti Qasym-Jomart Toqaevtan suhbat alǵan-almaǵanyna qatysty saýalǵa jaýap berdi, dep habarlaıdy QazAqparat.

«24 jeltoqsan kúni Almatyda ótip bara jatqan jylda barlyǵyn dúr silkindirgen oqıǵaǵa arnalǵan «Qańtar tragedııasy. Prezıdent Toqaev jáne sabaq alý» atty jańa kitabymdy usyna alatyndyǵyma senimdi bolǵan edik. Biraq, ókinishke oraı bizdi birneshe jyl boıy áýre-sarsańǵa salyp kelgen vırýs maǵan da jetti. Dárigerler maǵan ushýǵa jáne bireýlermen kezdesýge tyıym saldy. Sondyqtan Qazaqstandaǵy kitap tusaýkeser qańtarǵa deıin keıinge shegeriledi. Osynaý mańyzdy oqıǵa jaıynda kitap jazýyma ne túrtki bolǵandyǵyn aıtyp berý múmkindigim bolady dep úmittenemin», - dedi ol.

Qalamger áriptesteriniń kitaptyń qalaı jazylǵany jaıly jıi suraq qoıatyndyǵyn atap ótedi.

«Túsingenim, barlyǵyn Prezıdent Toqaevtan qańtar oqıǵasyna qatysty suhbat alǵan-almaǵanyma qatysty saýal qyzyqtyrady. Suhbat bolǵan joq. Prezıdent meniń mundaı kitap jazýǵa nıetim bar ekendigin biledi. Biraq jumysym jazylǵanǵa deıin de, jaryq kórgenge deıin de tanys bolǵan joq. Memleket basshysy ony oqýǵa ýaqyt tabady dep úmittenemin», - dedi Leonıd Mlechın.

Sonymen qatar ol «Leonıd Mlechın tarıhy» atty Youtube kanalynda osy aptadan bastap qańtar oqıǵasyna qatysty kópserııaly fılm jarııalanatyndyǵyn atap ótedi. Kún saıyn bir serııadan kórsetilmek.

Aıta keteıik, taıaýda Reseıdegi Qazaqstan elshiliginde Leonıd Mlechınniń «Tragıcheskıı ıanvar. Prezıdent Tokaev ı ızvlechenıe ýrokov» kitaby tanystyrylǵan edi.