Leonardo Dı Kaprıoǵa uqsaıtyn jigit tanymaldylyqtan sharshap ketkenin aıtty
ASTANA. QazAqparat - Shvetsııalyq 21 jastaǵy Konrad Annerýd Gollıvýdtyń ataqty juldyzy Leonardo Dı Kaprıonyń jas kezine qatty uqsaıtyndyǵymen jurtty tańǵaldyryp keledi. Biraq, onyń álemge tanymal akterge uqsaǵany ózine tipti unamaıdy, dep jazady «Komsomolskaıa pravda» gazeti.
Sebebi, kóshede kezdeskender odan qoltańba surap, birge sýretke túsýge shaqyryp ábden esin shyǵaratyn kórinedi. Basynda munyń bári qyzyq kóringenimen, «jalǵan ataq» ony tez sharshatqan.
«Dı Kaprıonyń ózi osynsha ataqty bolyp, sharshamaı qalaı júredi eken?», - deıdi Konrad Annerýd.
Basylymnyń jazýynsha, onyń akterge uqsastyǵy jeke jumystarynyń órkendeýine de septigin tıgizgen. Sebebi, onyń aktermen uqsastyǵy úshin ǵana áleýmettik jelidegi jeke paraqshasyna 40 myń adam tirkelipti. Model bolyp jumys jasaıtyn jas jigittiń tanymaldylyǵy osylaı arta túsken.
«Maǵan shetelge barý tipti qıyn. Byltyr Italııaǵa baryp edim, naǵyz synaq boldy. Jaǵalaýda jurttyń bári Leo dep aıqaılap, shaqyryp sýretke túsirip, esimdi shyǵardy», - deıdi Konrad.
Internet qoldanýshylar onyń bolashaqta ekinshi Dı Kaprıo bolyp, álemge tanylatynyn aıtady.
