Leonardo Dı Kaprıo pilderdiń qorǵaýyna 1 mln dollar qarajat bóldi
ASTANA. QazAqparat - Leonardo Dı Kaprıo - qorshaǵan ortanyń belsendi qorǵaýshysy. Ol ekologııa, flora men faýna máselelerine beıjaı qaramaıdy. Pilderdiń qyrylýyna alańdap, oǵan qyrýar qarjy bólgendigi de sonyń aıqyn dáleli.
Dı Kaprıo Save the Elephants qaıyrymdylyq qoryna mıllıon dollar aýdardy, dep habarlady Popcornnews. Akterdiń mundaı keń peıildigin Ien Dýglas-Gamılton uıymynyń basshysy keshki qonaqasynda málemdedi. «Brakonerler óltirgen pilderdiń sany tym kóp. Ótken jyly 30 myńnan astam pildiń kózi joıylǵan. Bul janýarlardyń jappaı qyrylyp-joıylýyn toqtatý bizdiń qolymyzda. Elephant Crisis Fund uıymy osy máseleni sheshýde mańyzdy ról atqarady. Sol úshin dáriger Dýglas-Gamıltonǵa alǵysymdy bildiremin», - dep jazylǵan Dı Kaprıonyń málimdemesinde. Leonardonyń ózi pilderdi qorǵaýǵa arnalǵan qaıyrymdylyq keshinde bolmasa da, onyń jasaǵan áreketi kópshilikke senim uıalatty. Shara barysynda taǵy bir mıllıon dollar jınaldy.
