Leonardo Dı Kaprıo BUU álem elshisi boldy

ASTANA. QazAqparat - Gollıvýd akteri Leonardo Dı Kaprıo BUU-nyń klımattyń ózgerýi jónindegi álem elshisi bolyp taǵaıyndaldy. Bul týraly búgin jýrnalısterge dúnıejúzilik uıymnyń bas hatshysy Pan Gı Mýn málim etti, dep jazady ITAR-TASS.

«Dı Kaprıo qorshaǵan ortany qorǵaý qozǵalysyndaǵy eleýli tulǵa», - dedi Pan Gı Mýn. Ol amerıkandyq akterdiń klımattyń ózgerýimen baılanysty problemalarǵa BUU-nyń kúsh-jiger jumsaýyn qoldaǵanyn qanaǵattanǵandyq sezimmen atap ótti. Bas hatshy Dı Kaprıony Bas Assambleıanyń 69-sessııasy aýqymynda 23 qyrkúıekte ótetin klımat boıynsha sammıtke qatysýǵa shaqyrǵanyn aıtty.

BUU bas hatshysynyń aıtýynsha, ol osy forýmnyń barysynda memleketter atmosferaǵa parnıktik gaz shyǵaryndary kólemin azaıtý jóninde ózderine eleýli mindettemeler alady dep úmittenedi.

Óz kezeginde Leonardo Dı Kaprıo ol úshin BUU-nyń álem elshisi bolý úlken qurmet ekenin málimdedi. «Men adamzat tarıhyndaǵy mańyzdy kezeńde klımat problemasy boıynsha qadamdardy jaqtaı otyryp, ózime moraldyq mindetteme alyp otyrǵanymdy sezinemin. Taıaýdaǵy jyldarda adamzat pen ǵalamsharymyzdyń taǵdyry bizdiń klımattyq daǵdarysqa qanshalyqty kóńil bóletinimizge baılanysty», - degen onyń sózin keltirgen BUU baspasóz qyzmeti.

Dı Kaprıo 1998 jyly óziniń esimimen atalatyn qor qurdy jáne ol aldyna tumsa tabıǵatty qorǵaýdy qamtamasyz etý, sondaı-aq adam men qorshaǵan ortanyń úılesimdikte ómir súrýi joldaryn izdestirý mindetin qoıyp otyr. Gollıvýd akteri BUU atynan ártúrli máselelerge qozǵaý salýmen aınalysatyn basqa da 11 álem elshilerine qosylady.