Leonardo da Vınchıdiń kartınasy 400 mln dollarǵa satyldy
ASTANA. QazAqparat - Leonardo da Vınchıdiń áıgili «Álem qutqarýshysy» (Salvator Mundi) týyndysy sársenbi kúni Nıý-Iorktegi Christie's aýktsıonynda 400 mln dollarǵa satyldy. Aýktsıondyq úı óziniń resmı saıtynda saýdanyń tikeleı translıatsııasyn júrgizdi, dep habarlaıdy QazAqparat TASS agenttigine silteme jasap.
Aýktsıon aldynda áıgili sýretshiniń týyndysy 100 mıllıon dollarǵa baǵalanǵan bolatyn.
Leonardo da Vınchıdiń shyǵarmashylyǵy boıynsha sarapshy Lıýk Seısonnyń paıymynsha, kartına Frantsııa koroliniń otbasynyń tapsyrysymen salynǵan. Keıin Anglııa koroli І Karl 1625 jyly Frantsııa koroli ІV Genrıhtiń qyzyna úılengennen keıin Anglııaǵa jetkizilgen.
Sýret 1649 jyly І Karlǵa qatysty ólim jazasy oryndalǵannan keıin qurastyrylǵan koroldik kollektsııa tiziliminde boldy. 1651 jyly aýktsıonda satylyp, 1666 jyly ІІ Karl tusynda koroldik kollektsııaǵa qaıtaryldy. Keıbir málimetterge qaraǵanda, sýret koroldiń jeke kabınetinde saqtalyp kelgen. Kartınanyń 1763 jyldan arǵy taǵdyry beımálim. Tek 1900 jyly ony ábden tozǵan kúıi koroleva Vıktorııa tusyndaǵy bedeldi adamdardyń biri jeke kollektsııa úshin satyp alady.
