Leonardo da Vınchı salǵan aıýdyń bas sýreti rekordtyq soma - £8,9 mıllıonǵa satyldy
NUR-SULTAN. QazAqparat – Christie's aýktsıonynda Leonardo da Vınchı salǵan aıý basynyń nobaıy satyldy, dep habarlaıdy QazAqparat.
Ony £8,9 mıllıonǵa (shamamen 12,3 mln AQSh dollary) satyp aldy. Bul – ıtalıan sýretshisiniń týyndysy úshin rekordty soma.
«Sýret— Leonardo da Vınchıdiń syzbashy retindegi sheberliginiń keremet dáleli», - delingen aýktsıon úıiniń Twitter-degi habarlamasynda.
Nobaı – bul qyzǵylt-aqshyl sary qaǵazǵa kúmis qaryndashpen salynǵan 7x7 sm ólshemdi sýret. Ol 1480 jyldardyń birinshi jartysynda jasalǵan. Bul – sýretshiniń qoltańbasy bar birneshe týyndylarynyń biri.
Satyp alýshynyń esimi jarııa etilmeı otyr. Al budan burynǵy rekord Leonardo Da Vınchıdiń «Jylqy men salt atty» týyndysy úshin ornatylǵan edi, ony £8,1 mıllıonǵa satyp aldy.
