Lensta esimdi áıel ShQO-nyń qurmetti azamatshasy atandy
ÓSKEMEN. QazAqparat - S.Amanjolov atyndaǵy ShQMÝ-dyń Ardagerler keńesiniń tóraıymy, pedagogıka kafedrasynyń professory Lensta Áýbákirova 8 naýryz merekesi qarsańynda «Shyǵys Qazaqstan oblysynyń qurmetti azamatshasy» ataǵymen marapattaldy, dep habarlaıdy «QazAqparat» HAA tilshisi.
Pedagogıka kafedrasynyń professory Lensta Raqymjanqyzy kóptegen ıgi isterdiń bastamashysy bolyp, alǵashqy joǵarǵy synyp oqýshylarynyń eńbek jasaqtary, birinshi aýla klýbtaryn uıymdastyrǵan.
Qala jáne oblys tarıhynda birinshi ret onyń basshylyǵymen balalar hokkeı komandasy qurylyp, oqýshylar arasynda «Altyn shaıba» klýbynyń syılyǵy atty qalalyq jarystar ótkizile bastady.
Onyń bastamasymen «tártipke kónbeıtin» balalar jazǵy demalystarynda eńbek etip, demalatyn «Dzerjınets» lageri quryldy.
Búginde Lensta Áýbákirova - ShQMÝ-dyń Ardagerler keńesiniń tóraıymy, «Qazaq tili» qalalyq qoǵamdastyǵynyń múshesi, qalalyq ákimdiktiń onomastıkalyq komıssııasy men bilim basqarmasynyń saraptamalyq komıssııasynyń múshesi.
