Lens Armstrongtyń dopıng-daýynan keıin velosporttyń abyroıyn qaıta jandandyrmaqpyn - UCI prezıdenti
ASTANA. QazAqparat - Halyqaralyq velosıpedshiler odaǵynyń (UCI) prezıdenti Braıan Kýkson Týr de Franstyń jeti dúrkin jeńimpazy Lens Armstrongtyń dopıng-daýynan keıin velosporttyń ataq-abyroıyn qaıta jandandyrýdy kózdeýde. Bul týraly ol búgin Astanada ótken baspasóz máslıhatynda habarlady.
Aıta keteıik, buryn habarlaǵanymyzdaı, Halyqaralyq velosıpedshiler odaǵynyń (UCI) prezıdenti Braıan Kýkson resmı issaparmen Astanaǵa kelgen bolatyn.
Joǵary mártebeli meıman aldaǵy jyldary Halyqaralyq velosıpedshiler odaǵy qandaı jumystarmen aınalysatyndyǵyn qysqasha aıtyp berdi.
«Men jańa qyzmetime endi ǵana kiristim jáne eń birinshi qolǵa alatyn jumysym - Lens Armstrongtan keıin edáýir kir kelgen uıymnyń bedelin, ataq-abyroıyn qaıta jandandyrý bolady, - dep atap ótti ol. - Velosıped sportyn budan ári álem boıynsha, sonyń ishinde Azııa qurlyǵynda damytýdy qolǵa alamyn. Bizdiń basty maqsatymyzdyń biri - áıelder arasyndaǵy velosportty damytý. Áıelderdi osy sportqa belsendi túrde tartyp, úzdik jaǵdaılar jasaýymyz shart. Sonymen qatar olımpıada qozǵalysynda velosporttyń ornyn odan ári kúsheıtýdi qalar edim. Jalpy meniń aldymda sheshimin kútetin keshendi mindetter tur jáne men aldaǵy aılarda jumysym qaýyrt bolady», - dep túıdi sózin B.Kýkson.
Atap óteıik, bul B.Kýksonnyń halyqaralyq sport uıymynyń basshysy qyzmetindegi eń alǵashqy sapary bolyp otyr. Brıtanııalyq Braıan Kýkson 2013 jyly qyrkúıekte prezıdenttikke saılanǵannan keıin Astanany Azııaǵa sapary kezindegi alǵashqy qalasy retinde belgilegen.
