Lens Armstrong «Astananyń» eks-bas menedjeriniń óziniń dopıng-tájirıbesine qatysy bar ekenin aıtty
ASTANA. QazAqparat - Sońǵy kezde basy daýdan arylmaı júrgen veloshabandoz Lens Armstrong ant arqyly jaýap berý kezinde «Astana» komandasynyń eks-bas menedjeri Iohan Brıýneldiń óziniń dopıng-tájirıbesine qatysy bar ekenin aıtty, dep habarlady Vesti.kz sheteldik BAQ-qa silteme jasap.
Sonymen qatar ol óziniń isinde bunyń aldynda aty-jóni belgili bolǵan adamdardyń esimderin atady. Olardyń arasynda sportshynyń bapkeri Pepı Martı, doktor Pedro Selaııa, doktor Lýsııa Garsıa del Moral jáne doktor Mıkele Ferrarı bar. Buǵan qosa, osy úderiske massaj jasaýshy Emma O'Reılı, sondaı-aq mehanıkter De Vrıeze men Maıreniń qatysy bolǵan.
Aıta keteıik, dopıng paıdalanǵany úshin 2012 jyldyń qazan aıynda veloshabandoz «Týr de Franstyń» 7 tıtýlynan aıyrylyp, ómir boıyna sporttan alastatyldy.
