Lenınniń Aral balyqshylarynan kómek suraǵan úndeýhatyna 95 jyl toldy
QYZYLORDA. QazAqparat-Aral óńiri kóp ultqa pana bolǵan kıeli aımaq.Oǵan sonaý 1921 jyly oryn alǵan tarıhı oqıǵa kýá deýge bolady. Búgin Aral aýdany tarıhtan oıyp turyp oryn alǵan oqıǵaǵa 95 jyl tolýyn eske aldy. Bul týraly «QazAqparat» HAA tilshisi aýdandyq ákimdikke silteme jasaı otyryp habarlaıdy.
1921 jyly búkil Reseıdiń Povolje ólkesi, Perm gýbernııasyna deıingi barlyq jerde qýańshylyq paıda bolyp, egin men shóp túgeldeı kúıip ketken edi. Sonyń saldarynan bul óńirdegi mal qyrylyp jatty. Mal men eginnen qol úzgen Volga boıyndaǵy mıllıondaǵan adam ashtyqqa ushyrady.
Osy ýaqytta Halyq komıssarlary Sovetiniń predsedateli Vladımır Lenın Aral balyqshylaryna arnap hat joldaǵan bolatyn. Onda Lenın Aral teńizinen aýlanǵan balyqtyń bir bóligin ashtyqtan isingen mıllıondaǵan qarttar men ólimniń az-aq aldynda turǵan balalarǵa berýdi ótinip, kómek suraǵan edi. Úndeýhattyń oryndalýyna Aral Sovdepiniń predsedateli Tólegen Medetbaev bastaǵan qanshama jomart balyqshy bir kisideı atsalysyp, el halqyn aman saqtaýǵa kúsh saldy.
Osy rette, búgin Aral aýdanynyń ákimi Muhtar Orazbaev sol tusta Araldyń atyn álemge tanytyp, eldi ashtyqtan azat etý jolynda 14 vagon balyq jóneltken áıgili balyqshylardyń urpaqtarymen kezdesti.
Kezdesýge arnaıy kelgen balyqshylardyń urpaqtary - G.Kemalova, Q.Súleımenov, O.Barmaǵambetov, B.Tilepov, Q.Erdiqalyqovtar óz rızashylyqtaryn bildirip, ata-baba erligin eske aldy. Sonymen qatar, sóz alǵan Saılaýbaı Jubatyrov aǵamyz osy bir tarıhı oqıǵanyń 100 jyldyǵyn respýblıkalyq deńgeıde atap ótýge usynys bildirdi.
Aıta keteıik, ákimdikte bas qosqan balyqshylar urpaqtaryna aýdan ákimi men jergilikti kásipkerlerdiń atynan estelik syılyqtar tabystaldy.
